ირაკლი კობახიძე ალენ ბერსეს შეხვდა – “მხარეებმა ქვეყნის ევროინტეგრაციის გზაზე არსებული გამოწვევები განიხილეს”

ირაკლი კობახიძე, ანტალიის დიპლომატიის ფორუმის ფარგლებში, ევროპის საბჭოს გენერალურ მდივანს, ალენ ბერსეს შეხვდა.

მთავრობის ადმინისტრაციის ცნობით, შეხვედრაზე საუბარი შეეხო საქართველოსა და ევროპის საბჭოს შორის არსებულ თანამშრომლობას. მათივე ინფორმაციით, მხარეებმა განიხილეს ქვეყნის ევროპული ინტეგრაციის გზაზე არსებული გამოწვევები და საქართველოში მიმდინარე პოლიტიკური პროცესები.

“პრემიერ-მინისტრმა ევროპის საბჭოს გენერალურ მდივანს დეტალური ინფორმაცია მიაწოდა ბოლო პერიოდში განვითარებული მოვლენების შესახებ”, – წერია პრესრელიზში.

მოგვიანებით კობახიძემ სოციალურ ქსელში დაწერა, რომ ნაყოფიერი შეხვედრა ჰქონდა ბერსესთან.

„ანტალიის დიპლომატიის ფორუმის ფარგლებში ნაყოფიერი შეხვედრა მქონდა ევროსაბჭოს გენერალურ მდივანთან, ბატონ ალენ ბერსესთან. შეხვედრისას ხაზი გავუსვი ევროსაბჭოსთან თანამშრომლობის მნიშვნელობას, როგორც ევროპული ინტეგრაციის გზაზე დემოკრატიული რეფორმების პროცესის ხელშემწყობ ფაქტორს. შეხვედრისას დავადასტურეთ ჩვენი მზადყოფნა, კიდევ უფრო გავაძლიეროთ თანამშრომლობა და გავაგრძელოთ აქტიური დიალოგი“, – აღნიშნავს პრემიერ-მინისტრი.

ბერსემ საქართველოს ირაკლი კობახიძესთან შეხვედრის შესახებ საუბრისას აღნიშნა, შეხვედრის მიზანი კავშირების გაუმჯობესება იყო.

„შედგა ჩვენს შორის კიდევ ერთი შეხვედრა, შეხვედრა იყო მნიშვნელოვანი, ჩვენი და ევროპის საბჭოს როლი არამხოლოდ კავშირზე ყოფნაა, არამედ ამ კავშირების გაუმჯობესება. სწორედ ეს იყო ამ შეხვედრის მიზანი, ჩვენი მიზანია ქართულ მხარესთან კონსტრუქციული დიალოგი, ვაგრძელებთ ერთად აქტიურ მუშაობას“, – აღნიშნა ბერსემ.