იენს სტოლტენბერგი – ნატო დაეხმარება საქართველოსა და ბოსნია-ჰერცეგოვინას, რათა დაიცვან საკუთარი თავი

ნატოს გენერალური მდივნის, იენს სტოლტენბერგის განცხადებით, ნატო კიბერუსაფრთხოების კუთხით უკრაინის მხარდაჭერას გააძლიერებს. ამის შესახებ ნატო-ს გენერალურმა მდივანმა ნატო-ს მინისტერიალის დასრულების შემდეგ, ბრიფინგზე განაცხადა.

სტოლტენბერგის თქმით, თავდაცვითი ალიანსი ასევე უზრუნველყოფს აღჭურვილობას, რათა უკრაინას, ქიმიური ან ბიოლოგიური თავდასხმისას დაეხმაროს.

სტოლტენბერგმა დასძინა, რომ ნატო ასევე სხვა პარტნიორ ქვეყნებსაც დაეხმარება. მათ შორის, საქართველოსა და ბოსნია-ჰერცეგოვინას, რათა ,,დაიცვან საკუთარი თავი”.

,,საქართველოსთვის, ნატო-საქართველოს არსებითად მნიშვნელოვანი პაკეტის მეშვეობით, ჩვენ შეგვიძლია, ჩვენი მხარდაჭერა გავზარდოთ, მათ შორის, ისეთ სფეროებში, როგორიცაა სიტუაციური ცნობიერება, უსაფრთხო კომუნიკაციები და კიბერუსაფრთხოება.

ბოსნია-ჰერცეგოვინასთვის ჩვენ შეგვიძლია შევიმუშავოთ თავდაცვის შესაძლებლობების განვითარების ახალი პაკეტი და დახმარება იქნება მორგებული, მოთხოვნაზე ორიენტირებული და შესაბამისი ქვეყნების სრული თანხმობით მიწოდებული”, – განაცხადა სტოლტენბერგმა.