საქართველომ 2025 წლის იანვარში მანდარინის ექსპორტიდან 1.3 მლნ აშშ დოლარის შემოსავალი მიიღო.
უფრო კონკრეტულად, წელს საქართველოდან 1.3 მლნ-ის 2,163 ტონა მანდარინი გავიდა ექსპორტზე, რაც თანხაში 81.4%-ით ნაკლებია, მოცულობაში კი, 81.7%-ით.
ექსპორტირებული მანდარინის 70.4% რუსეთზე მოდის, სადაც 983.4 ათასი აშშ დოლარის 1,523 ტონა მანდარინი გაიყიდა. ზოგადად, იანვარში ქართული მანდარინი მხოლოდ რუსეთსა და სომხეთში გავიდა. სომხეთში 333.3 ათასი აშშ დოლარის 639.4 ტონა.
რაც შეეხება სრულ სეზონს, 2024 წლის ნოემბერ-დეკემბერში ექსპორტზე 19.1 მლნ აშშ დოლარის 32,575 ტონა მანდარინი გაყიდა, რაც 25%-ით ნაკლებია 2023 წლის მაჩვენებელზე.
BM.GE დაინტერესდა, რა გახდა მასშტაბური კლების მიზეზი. აჭარის სოფლის მეურნეობის სამინისტროს აგრარული დეპარტამენტის უფროსი, ლევან ბოლქვაძე ამბობს, რომ შემცირების მიზეზი მოსავლის ნაკლებობაა, რაც ე.წ. მეწლეურობითაა განპირობებული. [ მეწლეურობა- როცა, ხილი კარგ მოსავალს წელიწად გამოშვებით იძლევა]
” სასოფლო-სამეურნეო კულტურების ექსპორტის მაჩვენებლები შესაბამისი კულტურის მოსავლის აღების პერიოდთან არის დაკავშირებული და განისაზღვრება მარკეტინგული წლით. მარკეტინგული წელი გულისხმობს პერიოდს მოსავლის აღების დაწყებიდან დასრულებამდე.
მანდარინისთვის მარკეტინგული წელი იწყება 1-ლი სექტემბრიდან. 2024 წლის 1-ლი სექტემბრიდან 2025 წლის 20 თებერვლამდე ექსპორტირებულია 32.6 ათასი ტონა მანდარინი, რაც წინა წლის შესაბამის პერიოდთან შედარებით 20.7%-ით ნაკლებია. ეს გამოწვეულია მოსავლიანობის შემცირებით, რაც თავის მხრივ გამოხატულია მეწლეურობის ფაქტორით.
მიმდინარე წელს სულ გადამუშავდა 7 400 ტონა არასტანდარტული ნაყოფი, რისთვისაც 2.6 მლნ ლარის სუბსიდია გაიცა. 2024-2025 წლის მოსავლის აღება და შესაბამისად ექსპორტი, წინა წელთან შედარებით, დაახლოებით 10-12 დღით ადრე (10 ნოემბრიდან) შევიდა აქტიურ ფაზაში, შესაბამისად, აღებული მოსავლის ძირითადი ნაწილის ექსპორტი (94.5%) ნოემბერსა და დეკემბერზე გადანაწილდა. 2023-2024 წლის იმავე პერიოდში განხორციელებულმა ექსპორტმა კი მთლიანი ექსპორტის 77.3% შეადგინა.
გასული წლის იანვარში ექსპორტის მეტი მაჩვენებელი დაკავშირებულია მოსავლის აღების გვიან დაწყებასთან. ციტრუსის სეზონის შეუფერხებლად განხორციელებისა და ციტრუსის რეალიზაციის ხელშეწყობის მიზნით, აჭარაში ციტრუსის საკოორდინაციო შტაბი მოქმედებდა, რომელიც მიზნად ისახავდა ციტრუსის ლოჯისტიკას, რეალიზაციის ხელშეწყობას, ასევე სუბსიდირების უზრუნველყოფას. შტაბმა მუშაობა 1-ელ თებერვალს დაასრულა”, – განაცხადა ლევან ბოლქვაძემ.
Loading ...
