თხილის ფასები ოზურგეთში – რა ვითარებაა ადგილობრივ ბაზარზე

გურიაში თხილის სეზონი უკვე კარგა ხანია დაიწყო. მთავარი კითხვა, რომელზე პასუხიც გლეხებს ყოველდღე აინტერესებთ, თხილის ფასია.  ფასი  მხოლოდ ციფრი არ არის, რადგან ის განსაზღვრავს, რამდენად დაფასდება გლეხის შრომა და როგორი მოგებით შეძლებენ მუშაობას ადგილობრივი რეალიზატორები.

მოქალაქეები  სხვადასხვა შეფასებას აკეთებენ – ზოგისთვის წლევანდელი ფასი მისაღებია, სხვებისთვის კი – იმედგაცრუების მიზეზი. ერთადერთი სიახლე ამ მხრივ ისაა, რომ თხილის მიმღებ ობიექტებში თხილის ხარისხის ე.წ. ”გატეხვით” შემოწმება აღარ ხდება.

ოზურგეთში თხილის ფასი კლებისკენ მიდის. ”გულშიშველა” ამჟამად  1 კილოგრამი 3 ლარი, ხანაც 3,20 ლარი ღირს, ”ბერძნულა” – 3,80 ლარი. თუმცა არის  ობიექტები, სადაც კარგი ხარისხის ”ბერძნულას” ჩაბარებას 4 ლარად შეძლებთ. სეზონის დასაწისში ”ბერძნულას” ჩაბარება 4,50 ლარით დაიწყო, თუმცა ფასი თანდათან დავარდა. როგორც თხილის მიმღებ ობიექტებში ამბობენ, ფასის ვარდნა მოსავლის ხარისხის გაუარესებას უკავშირდება.

თხილის მსხვილი რეალიზატორები, რომლებსაც პროდუქტი რეგიონს გარეთ გააქვთ, ამბობენ, რომ წელს თხილის ხარისხი გურიაში ძალიან დაბალია. ამის მიზეზად მწერი  აზიური ფაროსანა და მავნებლის საწინააღმდეგო შეწამვლითი ღონისძიებების არასათანადო განხორციელება სახელდება. ამბობენ იმასაც, რომ ბაზარზე შესაწამლი საშუალებების ხარისხი დაბალია და ზოგჯერ აღნიშნული წამალი უფრო მეტად აზიანებს თხილის ხეებს, ვიდრე ფაროსანა.