“კარგა ხანია ამის დაწერა მინდა, მაგრამ რომ წარმოვიდგენ, ბევრი ადამიანი რა არასწორად გაიგებს და ამის გამო შემაჩვენებს, სულ ვარიდებდი თავს. თუმცა ვფიქრობ, ამაზე ლაპარაკი საჭიროა. თურქეთში სამკურნალოდ წასვლასთან დაკავშირებით მინდა კომენტარი გავაკეთო. დასაწყისშივე აღვნიშნავ, რომ საერთოდ არ ვარ ძალიან მაღალი აზრის ქართულ მედიცინაზე და არ ვთვლი, რომ პაციენტებს არ სჭირდებათ უცხოეთში მკურნალობა (ჩვენდა სამწუხაროდ და სამარცხვინოდ ხშირად ჭირდებათ). კი ბატონო, ბევრ შემთხვევაში აქ არასწორად ისმევა დიაგნოზი, არასწორად ხდება მკურნალობის დანიშვნა და საზღვარგარეთ წასვლით არაერთი პაციენტი გადარჩა, მაგრამ
მხოლოდ ის, რომ კლინიკა ან ექიმი თურქეთშია და ამიტომ ეს უკვე ნიშნავს უკეთეს ხარისხს, ილუზია და თავის მოტყუებაა. სტამბულში მართლაც არის ძალიან მაღალი ხარისხის სამედიცინო სერვისის მიმწოდებელი რამდენიმე კლინიკა, მაგრამ იქ ყველა ვერ მიდის მაღალი ფასის გამო.
უამრავი მაგალითია თურქეთში არასწორად დასმული დიაგნოზის, არასწორი მკურნალობის, საშინელი გულგრილობის პაციენტის მიმართ.
რაც მთავარია, უმრავლეს შემთხვევაში, აშკარაა პაციენტებისთვის საჭიროზე ათჯერ მეტი კვლევის დანიშვნა (ფორმალური მიზეზი ის არის, რომ არ ენდობიან აქაურ კვლევებს, მაგრამ ძალიან ხშირად ისეთი კვლევებია დანიშნული, რაც საერთოდ არაფერ შუაშია პაციენტის მდგომარეობასთან და პირდაპირ ჩანს, რომ მხოლოდ ფულის გამოძალვას ემსახურებოდა).
ძალიან სამწუხაროა ის მესიჯები, რასაც ზოგჯერ თურქი სპეციალისტები ან ქართველი შაუამავლები ეუბნებიან პაციენტებს, მაგალითად, რაღაც ამ ჟანრში: ‘საქართველოში უამრავ ადამიანს აქვს სიმსივნე და თქვენთან ნამდვილად რაღაც ხდება’.
ერთხელ ოდიოზური მალინას შესახებ დავწერე, როგორ ატყუებს პაციენტებს, რომ ცე ჰეპატიტის სამკურნალო წამლები კიბოს იწვევს. სამწუხაროდ, ასეთი “მალინები”, ვინც ანგარების და თურქეთის კლინიკებისკენ მეტი პაციენტის გადინების მიზნით ამძიმებს სიტუაციას, როგორც ჩანს, მრავლდებიან.
თურქეთის ზოგიერთი კლინიკა მართლა ცეხს დაემსგავსა, სადაც ერთ თარგზე მოჭრილივით, კონვეირულ სერვისს სთავაზობენ ქართველებს.
მოკლედ, ამ პოსტის დედააზრი ის არის, რომ უფრო ფრთხილად და დაკვირვებულად ჩავაბაროთ ჩვენი ჯანმრთელობა თურქეთის კლინიკებს და გავიაზროთ, რომ ყველა არ იძლევა კარგი ხარისხის სერვისს და არაერთი ქართველი პაციენტის მსგავსად, ნუ დავკარგავთ დროს და უამრავ თანხებს და უფრო დამძიმებული მდგომარეობით მივუბრუნდებით ქართულ კლინიკას.
ყველას ჯანმრთელობას და ისეთ ქართულ ჯანდაცვას გისურვებთ, რომ არსად აღარ ვიყოთ გასაქცევი სამკურნალოდ.” – აცხადებს ინფექციონისტი მაია ბუწაშვილი.
კომენტარები
Loading ...