თბილისის სახელმწიფო უნივერსიტეტის სტუდენტებმა საპროტესტო აქცია გამართეს. ისინი მოითხოვენ, რომ შეიცვალოს რექტორის არჩევის წესი, რომლითაც აკადემიური საბჭო რექტორს ფარული კენჭისყრით ირჩევს.
გარდა ამისა, მათი მოთხოვნაა, აკადემიური საბჭო დაიშალოს, აშენდეს სტუდენტური საერთო საცხოვრებელი და სახელმწიფომ დააწესოს საბინაო სუბსიდია სტუდენტებისთვის. სტუდენტები აცხადებენ, რომ თუ მათი მოთხოვნები არ შესრულდება, საპროტესტო აქციები მუდმივ რეჟიმში გაგრძელდება.
“მაისის სტუდენტური მოძრაობის” წარმომადგენლის საბა ქერქაძის განცხადებით, უნივერსიტეტის მომავალ რექტორად, სავარაუდოდ ჯაბა სამუშიას კანდიდატურა განიხილება, რომელსაც ახლობლები და ნაცნობები წინსწრებით უკვე ულოცავენ რექტორად არჩევას.
“ჩვენ ვხედავთ არა პერსონალურ პრობლემას, არამედ სისტემურ გაუმართაობას. ეს არის ის არაჯანსაღი პროცესი, რაც უნივერსიტეტში მიმდინარეობს. სხვადასხვა პოლიტიკურ ჯგუფებს სურთ, უნივერსიტეტში მოვიდეს ის რექტორი, რომელიც მათ ინტერესებს გაატარებს და შესაბამისად, მოახდენს სტუდენტების აზრის კონტროლს, ეს არის რეალობა. აუცილებელია, რომ აკადემიური საბჭო დაიშალოს, შეიზღუდოს მისი უფლებები და რექტორის არჩევა გახდეს უფრო მეტად დემოკრატიული, რაც გულისხმობს იმას, რომ რექტორის არჩევის პროცესში ჩაერთვება პროფესურა სრულად და ისინი გადაწყვეტენ, თუ ვინ იქნება რექტორი. მანამდე, ჩვენ მოვითხოვთ, რომ დაინიშნოს დროებითი რექტორი, რომელიც უნდა აირჩეს პროფესურის მხრიდან. 20 ოქტომბერს ჩანიშნეს მოჩვენებითი პროცესი, რასაც “მაისის სტუდენტური მოძრაობა” არ ეთანხმება. ჩვენ ამ პროცესს არალეგიტიმურად ვცნობთ. თსუ-ში ყველა რექტორს არალეგიტიმურად ვცნობთ, რადგან ჩვენ სისტემური ცვლილებები გვჭირდება. ეს გამოიხატება იმაში, რომ რექტორის არჩევის წესი უნდა შეიცვალოს”,-განაცხადა ქერქაძემ.
Loading ...