თეთრხალათიანების აქცია ოზურგეთში

ოზურგეთის კლინიკა “მედალფას” ექიმებმა დღეს აქცია გამართეს. სოლიდარობის აქცია რამდენიმე დღის წინ დაკავებულ ექიმებს გიორგი ლობჟანიძეს და ვახტანგ ყიფიანს ეძღვნებოდა. კლინიკა “მედალფას” დირექტორი დავით მდინარაძე აცხადებს, რომ ექიმე ბს ასე არ უნდა ექცეოდნენ. ” ექიმები არ არიან თაღლითები და კაცის მკვლელები, მით უმეტეს, ეს სამი ექიმი არის საკუთარი საქმის დიდი პროფესიონალი. ვდგები იმ გოგონას და მისი ოჯახის მდგომარეობაში და რაც შეიძლება სწრაფ გამოჯანმრთელებას ვუსურვებ. ეს ექიმების ხვედრია, შეიძლება ათასი ოპერაცია გააკეთოს და ათასმეერთე პროცენტულად გართულდეს. ამ დროს ეს ექიმმა უნდა გაანალიზოს, რომ შემდეგ ეს გართულება აღარ მოხდეს. როცა ექიმი რთულ ოპერაციაზე შედის, იმის შიში არ უნდა ჰქონდეს, რომ ხელს სტაცებენ და ციხეში ჩააგდებენ ან პაციენტის ოჯახი დახვდება და შეურაცხყოფას მიაყენებს. 2018 წელს მომხდარ ფაქტზე 2020 წელს აკავებენ ექიმს, შუაღამეზე უვარდებიან სახლში და ხელბორკილებს მცირეწლოვანი შვილების და ხანშიშესული დედის წინაშე ადებენ. ასეთი პროფესიონალები, როგორიც გიორგი ლობჟანიძე და ვახტანგ ყიფიანი არიან, ღმერთმა უმრავლოს საქართველოს. “- განაცხადა დავით მდინარაძემ. შეგახსენებთ, რომ რამდენიმე დღის წინ თბილისის ცენტრალური საავადმყოფოს ექიმები გიორგი ლობჟანიძე და ვახტანგ ყიფიანი სამსახურეობრივი გულგრილობის და უკანონო საექიმო საქმიანობის ბრალდებით დააკავეს. ბრალი დაუსწრებლად წარედგინა ექიმ მაგდა ხოჭოლავასაც, რომელიც ამ დროისთვის იტალიაში იმყოფება. საქმე ეხება 2018 წელს ჩატარებულ ოპერაციას, რომლის შემდეგაც 23 წლის ქალი კომატოზურ მდგომარეობაში იმყოფება.