თბილისში, ჭავჭავაძის გამზირზე მდებარე შენობაში ხანძარი ლიკვიდირებულია

თბილისში, ჭავჭავაძის გამზირზე მდებარე შენობაში ხანძარი ლიკვიდირებულია. ამის შესახებ საქართველოს პირველ არხს საგანგებო სიტუაციების მართვის სამსახურში განუცხადეს.

შენობაში, სადაც საოფისე ფართებია განლაგებული, ხანძარი დაახლოებით ოთხი საათის წინ გაჩნდა.

წინასწარი ინფორმაციით, ცეცხლი შენობის სახურავს გაუჩნდა, შემდეგ კი ხანძარი მესამე სართულზე გავრცელდა.

საგანგებო სიტუაციების მართვის სამსახურის ცნობით, შემთხვევის შედეგად არავინ დაშავებულა.

ხანძრის გამომწვევი მიზეზები ამ დროისათვის უცნობია.

„საცხოვრებელი კორპუსის მესამე სართულზე და შენობის გადახურვაზე გავრცელებული იყო ხანძარი. მეხანძრე-მაშველების დროული რეაგირების შედეგად, მოხდა ხანძრის ლოკალიზაცია. ამ ეტაპზე მიმდინარეობს ხანძრის გარკვეული კერების დამუშავება. მეხანძრე-მაშველების აქტიური მუშაობის შედეგად, მეორე და პირველ სართულზე ხანძარი არ გავრცელებულა. დაშავებულების შესახებ ამ ეტაპზე არავის არ მოუმართავს. რაც შეეხება ხანძრის გამომწვევ მიზეზებს, ეს ჩვენს კომპეტენციაში არ შედის და შესაბამის სტრუქტურები დაადგენენ“, – განაცხადა თბილისის საგანგებო სიტუაციების მართვის სამსახურის მთავარი სამმართველოს ხელმძღვანელმა, ლევან მუსელიანმა.

ადგილზე იმყოფებოდა საგანგებო სიტუაციების მართვის სამსახურის ხელმძღვანელი თეიმურაზ მღებრიშვილი.