რესტორან “რესპუბლიკის” თანამშრომელს ახალი კორონავირუსი დაუდასტურდა. ინფიცირებული თანამშრომლის შესახებ ინფორმაცია რესტორნის მენეჯერმა საზოგადოებრივ მაუწყებელს დაუდასტურა.
მენეჯერის ცნობით, თანამშრომლების ნაწილმა ტესტირება უკვე გაიკეთა და პასუხი უარყოფითია, ნაწილზე კი პასუხებს ხვალ ელოდებიან. მისივე თქმით, რესტორანი ამ დრომდე დაკეტილია.
“დადასტურდა ნამდვილად ეს ერთი შემთხვევა. ინფიცირების წყარო ჯერ არაა დადასტურებული. სხვას არავის დადასტურებია ჯერ ჩვენთან, იმ შედეგებიდან, რაც უკვე გვაქვს. არის კიდევ ნაწილზე გაკეთებული ტესტირება და პასუხებს ველოდებით ხვალისთვის. ეტაპობრივად ხდება ტესტირება. თანამშრომელთა ნაწილი არის კარანტინში, ნაწილი თვითიზოლაციაში”. – საზოგადოებრივი მაუწყებლის ცნობით, ამბობს რესტორნის მენეჯერი, თაკო კვერნაძე.
გასულ 24 საათში საქართველოში Covid-19-ის 45 ახალი შემთხვევა დადასტურდა, რაც ქვეყნისთვის რეკორდული მაჩვენებელია. ახალი შემთხვევებიდან 23 აჭარას უკავშირდება. აქამდე საქართველოში ყველაზე მეტი შემთხვევა ერთ დღეში – 42 ინფიცირებული – 16 აპრილს იყო დადასტურებული.
სულ ქვეყანაში გამოვლენილია ახალი კორონავირუსის 1729 შემთხვევა, საიდანაც გამოჯანმრთელდა 1321 პაციენტი და გარდაიცვალა – 19.
Loading ...