თბილისში, პიკის საათებში დიდი სატვირთო ავტომობილების მოძრაობა შესაძლოა, აიკრძალოს – თბილისის მერია

იანვრიდან თბილისში, პიკის საათებში დიდი სატვირთო ავტომობილების მოძრაობა შესაძლოა, აიკრძალოს, – ამის შესახებ თბილისის მერმა კახა კალაძემ დედაქალაქის მთავრობის სხდომაზე განაცხადა.

“პიკის საათებში თბილისში დღეს 600 ათასზე მეტი კერძო ავტომობილი გადაადგილდება, ძალიან მაღალი ციფრია და ველით რომ კიდევ უფრო გაიზრდება. 2012 წელს დაახლოებით 180 ათასი ავტომობილი გდააადგილდებოდა თბილისში, დღეს კი უკვე 600 ათასს აჭარბებს ეს მაჩვენებელი, რაც ქმნის ე.წ. საცობებს. ამ საცობებში ვხვდებით დიდ ავტომობილებს, რაც კიდევ უფრო აფერხებს გადაადგილებას. ამ პრობლემის დასაძლევად ვფიქრობთ, კარგი გამოსავალი იქნებოდა დიდი გაბარიტების ავტომობილების მოძრაობის შეზღუდვა პიკის საათებში. რა თქმა უნდა ეს არ მოიცავს მთელი თბილისის მასშტაბს, საუბარია, კონკრეტულ უბნებზე, მონაკვეთებზე. საბოლოო გადაწყვეტილება ჯერ არ მიგვიღია ამაზე. ვთანამშრომლობთ ბიზნესთან, ვფიქრობთ მომავალი წლის იანვრიდან ავამოქმედოთ ეს სიახლე, რაც საბოლოოდ შეთანხმდება.

რაც შეეხება რეგულაციას, თუ როგორ წარმოგვიდგენია ამ სიახლის დანერგვა, ვფიქრობთ, რომ უნდა აიკრძალოს M3, N2 და N3 სატრანსპორტო საშუალებების მოძრაობა – დილის 8 სთ-დან 11 სთ-მდე და საღამოს 17:00 სთ-დან დან 20:00 სთ-მდე შუალედში. კიდევ ერთხელ ხაზს ვუსვამ, რომ დიდ გაბარიტებიანი ავტომობილების გადაადგილება, არა მთელ თბილისში, არამედ კონკრეტულ რაიონებსა და უბნებში შეიზღუდება, სადაც პიკის საათებში დიდია ნაკადი.

ეს შეზღუდვა არ იმოქმედებს შაბათს და კვირას, ასევე აგვისტოში, როდესაც ქალაქი მეტნაკლებად დაცლილია. ამასთან, იქნება გამონაკლისი შემთხვევებიც, კერძოდ, შეზღუდვა არ შეეხება, მაგალითად, საზოგადოებრივ ტრანსპორტს, არაგეგმიურ საავარიო და სიცოცხლის, ჯანმრთელობის საფრთხის აღმოსაფხვრელად საჭირო ტრანსპორტს, მუნიციპალური ან სახელმწიფო ინფრასტრუქტურული პროექტების განხორციელებისთვის საჭირო ტრანსპორტს, მოსწავლეებისა და სტუდენტების გდაადგილებისთვის საჭირო ტრანსპორტს, ტურისტული საქმიანობის განხორციელებისთვის საჭირო ტრანსპორტს და ა.შ. აღნიშნულ ავტომობილებზე ეს რეგულაცია არ გავრცელდება. ეს არის ინიციატივა, რომელიც ჩვენ გვაქვს შემუშავებული, თუმცა ვაგრძელებთ კომუნიკაციას და თანამშრომლობას ბიზნესთან, არ გვაქვს დამოკიდებულება, რომ ხისტად მივუდგეთ საკითხს, ვმსჯელობთ და თუ რა გადაწყვეტილება იქნება მიღებული მომდევნო დღეებში მოგაწვდით დეტალურ ინფორმაციას,”- განაცხადა კალაძემ.