“აგენტების კანონის” საწინააღმდეგო აქციაში მონაწილეობის მისაღებად მოქალაქეები დედაქალაქში თვითორგანიზებით მიდიან ბათუმიდან, ქუთაისიდან, წალენჯიხიდან და ზუგდიდიდან. პარალელურად, ის ადამიანები, ვინც თბილისში ჩასვლას ვერ ახერხებენ, აპირებენ მშობლიურ ქალაქებში გამართონ აქციები სადავო კანონპროექტის წინააღმდეგ. “რუსულ კანონად” წოდებული კანონპროექტის მიღების წინააღმდეგ თითქმის ორი კვირაა, მიმდინარეობს უწყვეტი ხალხმრავალი პროტესტი.
თბილისში წასვლის მსურველები ევროპის მოედანზე შეიკრიბნენ ბათუმში – როგორც იქ მყოფებმა უთხრეს რადიო თავისუფლებას, აქციაზე ბათუმიდან გამგზავრება სამოქალაქო ინიციატივაა, რასაც შეუერთდნენ არასამთავრობო ორგანიზაციებისა და პოლიტიკური პარტიების წარმომადგენლებიც.
აქციაზე წავიდნენ მოქალაქეები გურიის რეგიონიდანაც. კანონპროექტის გასაპროტესტებლად უკვე გაემგზავრნენ ოზურგეთიდან, ლანჩხუთიდან და ჩოხატაურიდან.
30 აპრილის ღამეს, ამ კანონის საწინააღმდეგო გამოსვლა პოლიციამ დაარბია – დაკავებულია 63 ადამიანი, დაშავდნენ აქციის ხუთი მონაწილე და ექვსი პოლიციელი. საერთაშორისო პარტნიორები საქართველოს ხელისუფლებას მოუწოდებენ, შეწყვიტოს ძალადობა პროტესტის მონაწილეების მიმართ, შინაგან საქმეთა სამინისტრო კი აცხადებს, რომ გამოსვლები სცილდება მშვიდობიანი პროტესტის ფორმებს.
Loading ...