თბილისიდან რომელი რეგიონების მიმართულებით გაძვირდა მგზავრობა

თბილისიდან ზოგიერთი რეგიონის მიმართულებით, მიკროავტობუსებით მგზავრობა გაძვირდა. რიგ მიმართულებებზე მგზავრობის ტარიფებმა 5 ლარით მოიმატა.

არსებული ინფორმაციით, საქალაქთაშორისო მგზავრთა გადაყვანის ტარიფების კორექტირება ქვეყანაში საწვავის გაძვირებასთან არის დაკავშირებული.

რომელი რეგიონების მიმართულებით გაძვირდა მგზავრობა თბილისიდან

როგორც „ბიზნესპრესნიუსს“ ავტოსადგურ „ოკრიბას“ ცხელ ხაზზე განუცხადეს, ამ დროისთვის, ფასების ცვლილება შეეხო ჭიათურისა და ბაკურიანის მიმართულებებს, სადაც მგზავრობის ღირებულება 15-დან 20 ლარამდე გაიზარდა.

ამასთან, მოქალაქეების ინფორმაციით, გაიზარდა საფასური კახეთის მიმართულებებზეც. მაგალითისთვის, სამგორის სადგურიდან კახეთის სოფლების მიმართულებით მგზავრობის ტარიფი 10 ლარიდან 15 ლარამდე გაიზარდა.

მაგალითისთვის, საუბარია ისეთ სოფლებზე, როგორიცაა: ოზაანი, ტიბაანი, არბოშიკი და ა.შ. ფასის ზრდა არ შეხებია წნორში მიმავალ მიკროავტობუსებს.

შეგახსენებთ, იმასაც რომ ტარიფები მანამდე მგზავრთგადამყვანმა კომპანიებმაც შეცვალეს. Metro Georgia-მ, Omnibus Express-მა და Georgian Bus-მა, ქვეყანაში საწვავის გაძვირების გამო, მგზავრობის ღირებულება ყველა მიმართულებაზე 5 ლარით გაზარდეს.