ავღანეთის ხელისუფლებაში მყოფმა რადიკალურმა ისლამისტურმა ჯგუფმა ერთი თვის განმავლობაში ქალების სილამაზის სალონების დახურვა ბრძანა.
“ქაბულსა და სხვა პროვინციებში ქალების ყველა სილამაზის სალონი დაუყოვნებლივ უნდა აიკრძალოს და დაემორჩილონ ჩვენს ბრძანებას. დამრღვევებს სამართლებრივი პასუხისმგებლობა დაეკისრებათ”, – ნათქვამია თალიბანის განცხადებაში.
ეს რადიკალური ჯგუფის უახლესი მცდელობაა იმისათვის, რომ ქალები საზოგადოებისთვის თვალსაჩინო სამსახურებს ჩამოაშოროს და სახლებში გამოკეტოს.
“თალიბანი ქალებს ადამიანებად კი არ თვლის, არამედ როგორც საქონელს, რომელსაც უნდა ფლობდეს და ჩაგრავდეს. უახლესი აკრძალვა დააზარალებს ათასობით ვიზაჟისტს და გამოიწვევს ქვეყნის მასშტაბით ასობით სალონის დახურვას”, – ამბობს ჯამილა აფგანი, ავღანელი ქალთა უფლებების აქტივისტი, რომელიც ავღანეთიდან გაიქცა და ახლა თურქეთში ცხოვრობს.
გაეროს წარმომადგენლობის შეფასებით, თალიბანმა ავღანეთში დაამყარა მსოფლიოში ყველაზე რეპრესიული რეჟიმი ქალების მიმართ. გაერომ ეს შეზღუდვები არაერთხელ დაგმო. ქალებს ეკრძალებათ მეექვსე კლასის შემდეგ განათლების მიღება, მთავრობაში ან კერძო სექტორში მუშაობა, პარკებში სეირნობა და სპორტული დარბაზების გამოყენება.
ახლა ქალებს ავღანეთში მხოლოდ საავადმყოფოებში ექთნად ან ექიმად მუშაობა შეუძლიათ. შეზღუდვების გამო, ისინი ფარულად მუშაობენ მასწავლებლებად და ვიზაჟისტებად.
Loading ...