თალიბანი აცხადებს, რომ ავღანეთში აშშ-ის თვითმფრინავი ჩამოვარდა, აშშ კომენტარს არ აკეთებს

თალიბანის პრესმდივანი, ზაბიჰულა მუჯაჰიდი აცხადებს, რომ 27 იანვარს აღმოსავლეთ ავღანეთში, ღაზნის პროვინციაში აშშ-ის სამხედრო თვითმფრინავი ჩამოვარდა.

მისი თქმით, თვითმფრინავის ჩამოვარდნას ემსხვერპლა აშშ-ის არმიის “ბევრი” წევრი. ეს ექსტრემისტული ჯგუფი ხშირად აზვიადებს ხოლმე მსხვერპლის რაოდენობას. ღაზნის პროვინცია ჰინდუ კუშის მთების ქვეშ მდებარეობს.

აშშ-ის არმიის მაიორმა, ბეთ რიორდანმა, რომელიც აშშ-ის ცენტრალური სარდლობის პრესმდივანია, კომენტარზე უარი განაცხადა, როცა მას თალიბანის ამ განცხადების შესახებ ჰკითხეს. მანამდე რიორდანმა თქვა, რომ აშშ-ის არმიის წარმომადგენლები იძიებენ ცნობებს ავღანეთში თვითმფრინავის ჩამოვარდნის შესახებ. მისი თქმით, გაურკვეველია რომელ ძალებს ეკუთვნოდა ჩამოვარდნილი თვითმფრინავი.

თუმცა, ავიაციის უსაფრთხოების ქსელი, ანუ ვებსაიტი, რომელიც ავიაციის უსაფრთხოების ფონდს ეკუთვნის და აღრიცხავს საჰაერო ავარიებს, ინციდენტებს და თვითმფრინავების გატაცებებს, ტვიტერით წერს, რომ ინტერნეტში გავრცელებული ვიდეოს თანახმად ეს აშშ-ის სამხედრო თვითმფრინავი იყო.

“ვიდეო ადასტურებს, რომ ავღანეთში ჩამოვარდა USAF Northrop Grumman E-11A” – წერს უწყება და დასძენს, რომ ეს იყო ბომბდამშენი გლობალ ექსპრესი – ანუ იმ ტიპის თვითმფრინავი, რომელსაც აშშ-ის არმია იყენებს ავღანეთის ელექტრონული დაზვერვისთვის.

www.radiotavisupleba.ge