“თავს ახალგაზრდა კაცივით ვგრძნობ” – ოზურგეთის “მედალფაში” ვაქცინაცია ორმა 80 წლის მამაკაცმა ჩაიტარა

ოზურგეთის კლინიკა “მედალფაში” დღეს კორონავირუსის საწინააღმდეგო ვაქცინაცია ორმა ხანდაზმულმა მოქალაქემ ჩაიტარა. ორივე მამაკაცი 80 წლისაა. თეიმურაზ თავაძემ კლინიკას ვაქცინაციისთვის ჩოხატაურიდან მომართა. აცრა ჩაიტარა და მისი ოჯახის განცხადებით თავს კარგად გრძნობს. ჰამლეტ გოგეშვილი ოზურგეთიდან არის. როგორც თვითონ ამბობს, ვაქცინაციამ წარმატებით ჩაიარა. – თავს ისე ვგრძნობ, როგორც ახალგაზრდა კაცი. არანაირი გართულება არ მქონია. ვაქცინაცია აუცილებელია. როგორც წითელას, წითურას და სხვა ინფექციების გამო აცრა საჭიროა, იგივე აუცილებლობაა კორონავირუსის შემთხვევაში. სხვა გზა არ არის, ვაქცინაცია ყველამ უნდა ჩავიტაროთ- განუცხადა ბატონმა ჰამლეტმა “გურიაTV”-ს. დღეს “ასტრაზენეკას” ვაქცინით ოზურგეთის კლინიკა “მედალფაში” შვიდი მოქალაქე აიცრა.