“თავისუფლება მიშას” – რუსთაველის გამზირზე საპროტესტო აქცია მიმდინარეობს

“თავისუფლება მიშას” – ამ სლოგანით რუსთაველის გამზირზე “ერთიანი ნაციონალური მოძაობის” აქცია დაიწყო.

აქციას მოქალაქეები მსვლელობით ორი ლოკაციიდან – “რესპუბლიკის მოედნიდან” და “კოლმეურნეობის მოედნიდან” შეუერთდნენ.

აქციის მონაწილეებს თან აქვთ ბანერი წარწერებით“: “ჩემო პრეზიდენტო, გილოცავ დაბადების დღეს, არ დანებდეთ”.

რუსთაველის გამზირზე, პარლამენტის შენობის მოპირდაპირე მხარეს მოწყობილია სცენა, საიდანაც გამომსვლელები, პოლიტიკური ლიდერები სიტყვით მიმართავენ აქციის მონაწილეებს.

როგორც “ინტერპრესნიუსს” “ნაციონალური მოძრაობის” ერთ-ერთმა წევრმა ნუგზარ წიკლაურმა განუცხადა, სამოქალაქო პროტესტი გაგრძელდება იქამდე, ვიდრე არ დასრულდება პოლიტიკური დევნა, ახლა კი, უპირველესი მოთხოვნა მიხეილ სააკაშვილის გათავისუფლებაა.

“აქციის უმთავრესი მოთხოვნაა – “თავისუფლება მიხეილ სააკაშვილს‘. ჩვენ ყველა, ვინც აქ ვართ, ვაცნობიერებთ, რომ სანამ ქვეყანაში არის პოლიტიკური დევნა, სანამ საქართველოს მესამე პრეზიდენტი არის დატყვევებული პოლიტიკური ნიშნით, ყველა მისი მხარდამჭერიც რეალურად არის პოლიტიკური ტყვეობის ქვეშ. ჩვენი არჩევანი, სურვილები, ჩვენს მიერ გამოთქმული მოსაზრება ნებისმიერ არჩევნებზე არის უარყოფილი და მიხეილ სააკაშვილის საპატიმროში ყოფნა, რეალურად გვართმევს მთავარ სამოქალაქო უფლებას, ეს არის არჩევნები”, – აცხადებს წიკლაური.