COVID-19 დაუდასტურდა ზუგდიდში გამოკვლეული 146 პირიდან ერთს. ზუგდიდის საზოგადოებრივი ჯანდაცვის ცენტრის ინფორმაციით, ინფიცირებულია ახალგაზრდა მამაკაცი, რომელიც იმყოფებოდა თვითიზოლაციაში. ცენტრის ხელმძღვანელის ნანა ოდიშარიას განცხადებით, პაციენტი მოთავსებულია რუხის კლინიკაში და იქ გადის მკურნალობას.
მისივე სიტყვებით, პაციენტის კონტაქტების ნაწილი გამოკვლეულია და ისინი გადაყვანილი არიან საკარანტინო სივრცეში. დამატებით კომენტარს ჯანდაცვის ცენტრში მოგვიანებით გააკეთებენ.
ამ დრომდე ზუგდიდში 6 პირს ჰქონდა ახალი კორონავირუსი დადასტურებული. აქედან ერთი იყო ზუგდიდის, მეორე კი ოკუპირებული აფხაზეთის მცხოვრები. ისინი აპრილის შუა რიცხვებში გამოჯანმრთელდნენ და გაეწერნენ კლინიკიდან. დანარჩენი შემთხვევები ანაკლია-განმუხურის საკარანტინო სივრცეში მოთავსებული პაციენტები იყვნენ სხვადასხვა რეგიონიდან. მათი ნაწილი გადაიყვანეს ქუთაისის და ნაწილი თბილისის საავადმყოფოებში.