“ვფიქრობ, რომ ხდება მოსახლეობის შეგნებულად შეცდომაში შეყვანა”-პრეზიდენტის საპარლამენტო მდივანი

ირაკლი კობახიძეს მოსახლეობა შეცდომაში შეგნებულად შეყავს – ეს განცხადება პრეზიდენტის საპარლამენტო მდივანმა სალომე ზურაბიშვილზე მიტანილი იერიშის საპასუხოდ გააკეთა.

სალომე ზურაბიშვილის ადმინისტრაცია “ოცნების” თავმჯდომარეს უხნის, ვინ არის ეროვნული დამოუკიდებლობის გარანტი და წამყვანი ფიგურა საგარეო ურთიერთობებში.

ვფიქრობ, რომ ხდება მოსახლეობის შეგნებულად შეცდომაში შეყვანა, ვინაიდან კონსიტუცუციის თანაავტორმა უნდა იცოდეს, რომ პრეზიდენტი არის სახელმწიფოს მეთაური, ის არის ქვეყნის ერთიანობის, ეროვნული დამოუკიდებლობის გარანტი. ის წარმოადგენს სახელმწიფოს საგარეო ურთიერთობებში და არის ქვეყნის უმაღლესი თავარსარდალი. უსაფრთხოების საბჭოს მოვალეობაა შეაფასოს შიდა და გარე საფრთხეები და აღნიშნული ინფორმაცია მიაწოდოს ქვეყნის უმაღლეს მთავარსარდალს და ქვეყნის ხელმძღვანელობას,“ – განაცხადა გიორგი მსხილაძემ.

ზურაბიშვილს მმართველი გუნდის ლიდერები მას შემდეგ აკრიტიკებენ, რაც პრეზიდენტმა რუსეთში დაწყბული სამხედრო ამბოხის პარალელურად უსაფრთხოების საბჭოს მოწვევა საგანგებო ბრიფინგიდან მოითხოვა. ამ განცხადების შემდეგ მმართველი გუნდის ლიდერმა, ირაკლი კობახიძემ პრეზიდენტი ამჩატებულად მოიხსენია.