ვოლოდიმირ ზელენსკი – უკრაინისთვის ძნელია რუსეთთან მოლაპარაკების გაგრძელება იმ სიმხეცის შემდეგ, რაც ბუჩაში ჩაიდინეს

უკრაინისთვის ძალიან ძნელია მოლაპრაკებების გამართვა რუსეთთან იმ სიმხეცის შემდეგ, რომელიც რუსეთის ჯარმა ჩაიდინა ბუჩაში. ამის შესახებ უკრაინის პრეზიდენტმა ვოლოდიმირ ზელენსკიმ ქალაქ ბუჩაში განაცხადა, სადაც ის ჟურნალისტებთან ერთად ჩავიდა.

ზელენსკის თქმით, სიმხეცე, რომელიც ქალაქში ჩაიდინეს, განასახიერებს რუსი სამხედროების სახეს და დასძინა, რომ “ისინი ადამიანებს უფრო უარესად ექცევიან, ვიდრე ცხოველებს”.

„ძალიან ძნელია მოლაპარაკებების წარმართვა, როდესც ხედავ, რა ჩაიდინეს მათ აქ“ , – განაცხადა ზელენსკიმ.

მისი თქმით, რაც უფრო დიდი ხნით ხდება რუსეთის მიერ უკრაინასთან მოლაპარაკებების გადადება, ვითარება მით უფრო უარესდება.

ზელენსკიმ წამყვანი ქვეყნების ლიდერებზე ისაუბრა, რომლებმაც გადაწყვიტეს, უნდა გახდეს თუ არა უკრაინა ნატოს წევრი და აღნიშნა:

„ვფიქრობ, აქ უნდა მოვიდნენ და ნახონ, როგორ მთავრდება ფლირტი, როგორ მთავრდება რუსეთის ფედერაციასთან ეს ფლირტი“, – განაცხადა მან.

შეგახსენებთ, გუშინ გაკეთებულ განცხადებაში უკრაინის პრეზიდენტმა ვოლოდიმირ ზელენსკიმ გერმანიისა და საფრანგეთის ყოფილი ლიდერები ანგელა მერკელი და ნიკოლა სარკოზი ბუჩაში მიიწვია.

“ქალბატონ მერკელსა და ბატონ სარკოზის ბუჩაში ვიწვევ, რათა ნახონ, სადამდე მიგვიყვანა რუსეთისადმი დათმობების პოლიტიკამ”, – განაცხადა ზელენსკიმ და დასძინა, რომ დასავლეთს არ ადანაშაულებს, მაგრამ “გვაქვს უფლება, ვისაუბროთ მათ გაუბედაობაზე”.