ზელენსკი ისრაელის პარლამენტს – ჩვენი ხალხი ახლა დახეტიალობს მსოფლიოში, ეძებს ადგილს ისევე, როგორც თქვენ ოდესღაც – ეს გაუმართლებელი ომია, რომლის მიზანია გაანადგუროს ჩვენი ერი

უკრაინის პრეზიდენტმა ვოლოდიმირ ზელენსკიმ ისრაელის ქნესეთში ვირტუალური გამოსვლისას აღნიშნა, რომ 24 თებერვალი, რუსეთის უკრაინაში შეჭრის თარიღი, ასევე იყო 1920 წელს გერმანიაში ნაცისტური პარტიის დაარსების თარიღი.

„ნაცისტების შემდეგ 102 წლის თავზე, ბრძანება იქნა გაცემული უკრაინაში რუსეთის შეჭრის დაწყების შესახებ, რომელმაც უკვე მოკლა ათასობით ადამიანი და მილიონობით ადამიანი უსახლკაროდ დატოვა“, – აღნიშნა ზელენსკიმ.

ზელენსკის თქმით, ამ ომის მიზანი უკრაინელი ერის განადგურებაა.

„ჩვენი ხალხი ახლა დახეტიალობს მსოფლიოში, ეძებს ადგილს ისევე, როგორც თქვენ ოდესღაც ხეტიალობდით. ეს არის ტოტალური და გაუმართლებელი ომი, რომლის მიზანია გაანადგუროს ჩვენი ერი, ჩვენი ქალაქები, ჩვენი კულტურა, ჩვენი შვილები“, – დასძინა ზელენსკიმ.

უკრაინის პირველმა პირმა განაცხადა, რომ რუსები იყენებენ ნაცისტური პარტიის ტერმინოლოგიას და სურთ გაანადგურონ ყველაფერი.

„ნაცისტებმა ამას უწოდეს „ებრაული საკითხის საბოლოო გადაწყვეტა“ , – აღნიშნა ზელენსკიმ.