"ვიწამლებით ხალხი, ვყიდულობთ წყალს და ვსვამთ. გვეშინია ამ წყალის დალევა" – შემოქმედელის ქუჩის მცხოვრებლების პრობლემები

ოზურგეთში, იაკობ შემოქმედელის ქუჩის პირველი შესახვევის მაცხოვრებლები დღეს ქუჩაში ორმა პრობლემამ გამოიყვანა. პრობლემა მზიან ამინდშიც კარგად ჩანს. გაუმართავი წყალმომარაგება და  დამსკდარი მილები, რომლებიდანაც წყალი პირდაპირ ქუჩაში მოედინება. ამით კი სასმელი წყალი ბინძურდება. წყლის დინებით გაჩენილი ორმოები კი ამ ქუჩაზე მაცხოვრებელ ბავშვებს უსაფრთხო გადაადგილებას უზღუდავს. მუდმივად მომდინარე წყალმა ქუჩაც დააზიანა. ადგილობრივები აცხადებენ, რომ მერია ასფალტის დაგებას წყლის სისტემის მოწესრიგებამდე არ აპირებს. გაერთიანებული წყალმომარაგების გურიის რეგიონული ფილიალის უფროსი, დავით ცერცვაძე ამბობს, რომ აღნიშნული ქუჩიდან კომპანიას შეტყობინება არაერთგზის მიუღია და პრობლემაც გადაუჭრიათ. დღესაც ,,გურია TV’’ მისვლის შემდეგ სამსახურმა აღნიშნულ ქუჩაზე ბრიგადა გაგზავნა და როგორც ცერცვაძე ამბობს, სამუშაოებს ხვალ დილიდან დაიწყებენ.