ვიტალი კლიჩკო – კიეველებს მოვუწოდებ, ეს ღამეც თავშესაფრებში გაატარონ

კიევის მერის, ვიტალი კლიჩკოს განცხადებით, კიევში დღევანდელი ღამეც ძალიან რთული იქნება. ამის შესახებ მან სოციალურ ქსელში დაწერა.

„ღამე ისევ მძიმე იქნება. ამიტომ ჩვენი დამცველები ემზადებიან დედაქალაქის დასაცავად. კიეველებს მოვუწოდებ, ეს ღამეც თავშესაფრებში გაატარონ, რადგან მტერი უფრო მხეცდება. ცხრილავს მშვიდობიან სახლებს. განაგრძობს ჩვენი ინფრასტრუქტურის განადგურებას, მიუხედავად იმისა, რომ თავად განიცდის დიდ დანაკარგებს – ადამიანურსაც და სამხედრო ტექნიკისაც. როგორც ჩანს, რუსები არ ელოდნენ ასეთ პასუხს და უკრაინელი ხალხის ასეთ სულს“, – წერს კლიჩკო.

მისივე თქმით, უკრაინელი სამხედროები გმირულად იბრძვიან მთელ უკრაინაში.

„ჩვენი ერი შეიკრა იმისთვის, რომ დაიცვას თავისი სახელმწიფო. ურდო ცდილობს კიევში შემოჭრას, მაგრამ ჩვენი მცხოვრებლები აპირებენ პასუხი გასცენ აგრესორს“ , – განაცხადა მერმა.