თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, კორონავირუსის ათი ახალი შემთხვევიდან ხუთი იმპორტირებულია, ორი კი ლენჯერს უკავშირდება.
ეზუგბაიას თქმით, კიდევ ორი დადასტურებულ შემთხვევასთან კონტაქტს განეკუთვნება, ხოლო ერთ შემთხვევაზე მიმდინარეობს ეპიდკვლევა წყაროს დადგენის თვალსაზრისით.
„ორის წყარო არის ლენჯერი, ორი დადასტურებულ შემთხვევასთან კონტაქტია, ხუთი შემოტანილია, ანუ იმპორტირებული პაციენტების შემთხვევაა, აქედან ერთი სატვირთო ავტომანქანის მძღოლია. ერთ შემთხვევაზე ეპიდკვლევა გრძელდება“, – განაცხადა ეზუგბაიამ.
მისივე ინფორმაციით, კორონავირუსისგან გამოჯანმრთელებულთა რაოდენობა ამ დროისთვის ინფიცირებულთა 80 პროცენტს შეადგენს, კოვიდ-ცენტრებში კი 267 პაციენტი აგრძელებს მკურნალობას.
ეზუგბაიას განმარტებით, 267 პაციენტიდან ხუთი კვლავ კრიტიკულად მძიმეა, ხოლო 24-ის მდგომარეობა მძიმეა.