ვინ იქნება პაატა კუნჭულიას კონკურენტი ოზურგეთის მერობისთვის ბრძოლაში

4 ოქტომბრის ადგილობრივი თვითმართველობის არჩევნებამდე ერთ თვეზე ცოტა მეტი დრო რჩება.

ამ დროისთვის ოზურგეთში მერობის კანდიდატი მხოლოდ ,,ქართული ოცნება – დემოკრატიული საქართველოს ‘’ ჰყავს დასახელებული. მერობის კანდიდატების წარდგენის ბოლო ვადა 4 სექტემბერია. ოპოზიციურ პარტიებს, რომლებიც არჩევნებში მონაწილეობენ, ,,ლელო ძლიერი საქართველო და ,, გახარია საქართველოსთვის’’ ოზურგეთში ოფიციალურად კანდიდატები არ წარუდგენიათ. თუმცა, დღეს ,,გურია TV’’-სთან სატელეფონო საუბარში ,,ლელოს’’ ადგილობრივმა ლიდერმა ვლადიმერ ქვილორიამ გავრცელებული ინფორმაცია დაგვიდასტურა, რომლის მიხედვითაც მათ პარტიას ოზურგეთში მერობის კანდიდატი არ ეყოლება. რაც შეეხება ,, გახარია საქართველოსთვის’’ , პარტიაში გვითხრეს, რომ 4 სექტემბრამდე დრო ჯერ კიდევ არის და შესაბამისად იმის თქმა, რომ მათ ოზურგეთში კანდიდატი არ ეყოლებათ, ნაადრევია.

გასული ადგილობრივი თვითმმართველობის არჩევნებისგან განსხვავებით, ოზურგეთს წელს არც მერობის დამოუკიდებელი კანდიდატი  ეყოლება. წინა რამდენიმე არჩევნებში მონაწილემ, ყოფილმა მერმა კოტე შარაშენიძემ არჩევნებში მონაწილეობაზე უარი თქვა და მიზეზად ოჯახური მდგომარეობა დაასახელა.

დახვდება თუ არა ოზურგეთში “ქართულ ოცნებას” მოსუფთავებული საარჩევნო ველი, “გახარია საქართველოსთვის’’ გადაწყვეტილებაზეა დამოკიდებული, რომელიც 4 სექტემბერს გახდება ცნობილი.