ვინ არის ოზურგეთში პანთეონის მოწყობის ინიციატორი

ოზურგეთის მუნიციპალიტეტის საკრებულოს ბიუროზე პეტიცია იქნა წარმოდგენილი, რომლის ავტორი ოზურგეთის ადგილობრივ ხელისუფლებას შესაბამისი ფინანსური სახსრების და მიწის ნაკვეთის გამოყოფას სთხოვს, რათა ქალაქში საზოგადო მოღვაწეთა პანთეონი დაარსდეს.

პეტიციის ავტორი ზურაბ თავბერიძეა. ინიციატივის მიხედვით, პანთეონში ოზურგეთში მოღვაწე ხელოვნების, კულტურისა და საზოგადო მოღვაწეები, ოზურგეთის საპატიო მოქალაქეები და საქართველოს ეროვნული გმირები უნდა დაიკრძალონ.

პეტიცია ოზურგეთის მუნიციპალიტეტის ოფიციალურ ვებ–გვერდზე უკვე გამოქვეყნებულია. იმისთვის, რომ ზურაბ თავბერიძის ინიციატივა საკრებულომ განიხილოს, პეტიციამ ოზურგეთში რეგისტრირებული მოსახლეობის ხმების 0,5% უნდა მოაგროვოს ანუ ინიციატივას ხმა მინიმუმ 325 ოზურგეთელმა უნდა მისცეს. აღნიშნული პროცედურისთვის ვადად ერთი თვეა განსაზღვრული. იხილეთ პეტიცია.