მედიისა და სამოქალაქო საზოგადოების მანიფესტი საფრთხისშემცველი მედიაგარემო შესახებ აწერენ ხელს – ისინი მოუწოდებენ ხელისუფლებას, უზრუნველყონ ჟურნალისტების უსაფრთხო გარემოში მუშაობა.
მანიფესტს ხელი ფორმულას სტუდიაში მოეწერა.
როგორც მანიფესტის ხელმომწერები აცხადებენ, 2020-2021 წლებში მედიაგარემო განსაკუთრებით დამძიმდა და კიდევ უფრო რთული გახდა ჟურნალისტებისთვის მუშაობა, რაზეც პასუხისმგებელი მმართველი პარტიაა.
“ერთად შეკრების ბოლო მიზეზი ჟურნალისტ ვახო სანაიაზე თავდასხმაა. ჩვენ ყველა ერთად გავხდით იმის მოწმე, თუ როგორ მოხდა მასთან ფიზიკური ანგარიშსწორება ჟურნალისტური საქმიანობის გამო. ჩვენ მოვისმინეთ არაერთი რეაქცია ამ ფაქტზე. მათ შორის ამერიკის შეერთებული შტატების საელჩოსი, რომელმაც მოუწოდა ხელისუფლებას, აღნიშნულ საქმესთან ერთად, სრულად გამოიძიონ ჟურნალისტებზე ძალადობის სხვა გაუხსნელი საქმეები. აქვე ვიტყვით, რომ პროკურატურის მხრიდან მსგავს საკითხზე პირველად იყო სწრაფი რეაგირება და იმედია, საქმეზე აღსრულდება სამართალი, თუმცა ვთქვათ ისიც, რომ ამ ქვეყანაში ჟურნალისტები თავს უსაფრთხოდ ვერ ვგრძნობთ და ამისი მიზეზი ის არის, რომ ჩვენს კოლეგებზე სხვადასხვა დროს განხორციელებული მუქარის, დაშინების, თვალთვალის, შანტაჟის, თავდასხმების ფაქტები რეაგირების გარეშე არის დარჩენილი”. – თქვა ნინო ჟიჟილასვილმა.
მედიისა და სამოქალაქო საზოგადოების მანიფესტი
“2020-21 წლებში საქართველოში მედიაგარემო ძალიან დამძიმდა. გახშირდა ჟურნალისტებზე სიტყვიერი თუ ფიზიკური თავდასხმები. სახელმწიფო არ უზრუნველყოფს ჟურნალისტების უსაფრთხოებას. მმართველი პარტიის მაღალჩინოსნები სიძულვილის ენით, აგრესიით და ბოიკოტით პასუხობენ მედიის კრიტიკულ კითხვებს. სახელმწიფო პროპაგანდის მანქანა კრიტიკულ მედიას პოლიტიკურ ოპონენტებად ნათლავს და მათ მიმართ შეუწყნარებლობას უწყობს ხელს. პოლიტიკურად პოლარიზებულ საზოგადოებაში მედიისადმი ასეთი დამოკიდებულება ახალისებს მორიგ თავდასხმებს. მიმდინარეობს პოლიტიკურად მოტივირებული სამართალწარმოება მედიის წარმომადგენლების წინააღმდეგ. მაუწყებლობის მარეგულირებელი ორგანო პოლიტიზებულია და ცენზურის დაწესებას ცდილობს,
ჩვენ, მედიისა და სამოქალაქო საზოგადოების წარმომადგენლები მოვუწოდებთ გადაწყვეტილების მიმღებ უმაღლესი რანგის პირებს, საქართველოს პრემიერ-მინისტრს, პარლამენტის წევრებს, პარტია „ქართული ოცნების“ თავმჯდომარეს:
- უზრუნველყონ ჟურნალისტებზე თავდასხმების სწრაფი გამოძიება და საზოგადოების ინფორმირება
- შეწყვიტონ მედიის წარმომადგენლების წინააღმდეგ წამოწყებული პოლიტიკურად მოტივირებული საქმეები
- შეწყვიტონ აგრესიული რიტორიკა და სიძულვილის წახალისება მედიის წარმომადგენლების მიმართ
- შეწყვიტონ კრიტიკული მედიის ბოიკოტი და აღადგინონ მედიასთან საქმიანი ურთიერთობის რეჟიმი
- შეწყვიტონ კომუნიკაციების მარეგულირებელი კომისიის გამოყენება პოლიტიკური მიზნით
ვფიქრობთ, ამ მოთხოვნების შესრულება ხელს შეუწყობს საზოგადოებაში პოლარიზაციის შემცირებას, განმუხტავს დაძაბულობას და გააუმჯობესებს მედიაგარემოს”, – ვკითხულობთ მანიფესტში.
Loading ...