ბათუმში საპროტესტო აქციების დროს დაკავებული თემურ ქათამაძე მიგრაციის დეპარტამენტის დროებითი მოთავსების ცენტრიდან წერილს აგზავნის, სადაც სასამართლოსგან ითხოვს საცოლესთან რელიგიური წესით ქორწინებისთვის ერთ სასურველ დღეს, 3 საათით მიგრაციის ცენტრიდან თბილისში გასვლის უფლებას.
“16.01.2025 წელს საქართველოდან გაძევების მიზნით ჩემი დაკავებიდან დღემდე გასული 3 თვის განმავლობაში ჩატარებული არც ერთ სასამართლოში სამართალი არ მინახავს!
მიგრაციის ცენტრში 3 თვე გატარებული მაქვს მუდმივი ფსიქოლოგიური ზეწოლის, შეფერხების, გაწელვის და ჩემი ფუნდამენტური უფლებების დარღვევის ქვეშ.
მიგრაციის მიერ ჩემს მიმართ განხორციელებული აღნიშნული არაადამიანური მოქმედებები თავიდან ჩემს მიმართ მიმდინარე სასამართლოებში ჩემი მტკიცებულებების დროულად წარდგენის შეფერხების მიზნით იყო, შემდეგ კი ჩემი 48-დღიანი ხანგრძლივი შიმშილობის შეწყვეტის მიზანს ემსახურებოდა. ასევე შიმშილობის შემდეგ გადაყვანილი კლინიკა “ვივამედში” ჩემი მკურნალობის შეწყვეტის და 2 დღეში უკან დაბრუნების მიზანს.
17.03.2025 წელს მიგრაციის ადმინისტრაციის ქმედება გავასაჩივრე მთავარი პროკურატურაში, ჩემი ჯანმრთელობის და სიცოცხლის განზრახ საფრთხის ქვეშ დაყენების ბრალდებით, თუმცა დღემდე რეაგირება არ მომხდარა.
მოგახსენებთ, რომ 2023 წლიდან თურქეთში ჩემს მიმართ დაკავების ორდერია გამოცემული, ანუ თურქეთში გაძევების შემთხვევაში იქ დაპატიმრება და ციხე მელოდება. ამ რეალობიდან გამომდინარე, 5 წელია მყავს საცოლე ნონა კაკულია, ამიტომ თურქეთში გაძევებამდე, ნონა კაკულიასთან რელიგიური წესით ქორწინების დიდი სურვილი მაქვს. ჩემი თურქეთში გაძევების შემდეგ დიდი ალბათობით აღნიშნულის შანსი აღარ გვექნება. სამწუხაროდ, აღნიშნული რიტუალის მიგრაციის ცენტრში ჩატარების საშუალება, მიგრაციის ადმინისტრაციამ არ მოგვცა.
“უცხოელთა და მოქალაქეობის არ მქონე პირების სამართლებრივი მდგომარეობის შესახებ” საქართველოს კანონის 36-ე მუხლის საფუძველზე, თავშესაფრის მაძიებელი სტატუსის მქონე ეთნიკური ქართველის სახით, თქვენი სასამართლოსგან ვითხოვ, ჩემ საცოლესთან რელიგიური წესით ქორწინებისთვის, მომავალ ერთ სასურველ დღეს, მხოლოდ 3 საათით მიგრაციის ცენტრიდან ქალაქ თბილისში გასვლის უფლებას, აღნიშნული რიტუალის შესაბამის ეკლესიაში და მეჩეთში ჩატარებისთვის.
ვიმედოვნებ, ჩემი ამ მოთხოვნის დაკმაყოფილებით საქართველოს საზოგადოებას აჩვენებთ ქართული სასამართლოს ადამიანურ სახეს!” – ნათქვამია წერილში.
ცნობისთვის, 15 აპრილს ქათამაძის საქმეზე თბილისის საქალაქო სასამართლომ შინაგან საქმეთა სამინისტროს შუამდგომლობა გაითვალისწინა და ქათამაძეს საემიგრაციო პატიმრობა 6 თვით გაუხანგრძლივა.
ტაბულას ინფორმაცია საქართველოს ახალგაზრდა იურისტთა ასოციაციაში (საია) დაუდასტურეს.
18 მარტს გამართულ სხდომაზე თბილისის საქალაქო სასამართლომ არ დააკმაყოფილა, ბათუმის აქციების მედროშის, თემურ ქათამაძის მოთხოვნა, მისთვის საერთაშორისო დაცვის მინიჭების თაობაზე, რაც ლტოლვილის სტატუსს, ასევე ჰუმანიტარული ან დამატებითი დაცვის სტატუსს გულისხმობს.
სხდომაზე, თემურ ქათამაძემ სასამართლოს პროცესის გადადების შუამდგომლობით მიმართა. ქათამაძის განცხადებით, ის ფსიქოლოგიურ ზეწოლას განიცდიდა, როგორც მიგრაციის დეპარტამენტის დროებითი მოთავსების ცენტრში, ისე კლინიკა ვივამედში. ქათამაძემ სასამართლოს მტკიცებულებების შესაგროვებლად დრო სთხოვა. მოსამართლე დიანა ფარქოსაძემ ქათამაძის შუამდგომლობა არ დააკმაყოფილა. მოსამართლის განმარტებით, შუამდგომლობა დასაბუთებული არ იყო.
“მიგრაციის დეპარტამენტის წარმომადგენლებისა და ვივამედის ადმინისტრაციის და მედპერსონალის ფსიქოლოგიური წნეხის შედეგად კვების აღდგენის მკურნალობა შევწყვიტე კლინიკა ვივამედში და დავბრუნდი უკან მიგრაციის დეპარტამენტში ჩემი მკურნალობის მეორე დღეს.
კლინიკიდან წამოვიღე კვების 5 კონტეინერი, ჩემს ოთახში შევინახე , განთავსებული არის 116-ე ოთახში, მტკიცებულების სახით, რაც კლინიკაში არასათანადოდ მომაწოდეს და ჩემი სიცოცხლე საფრთხის ქვეშ დააყენეს ,მიზანმიმართულად.
აღნიშნულთან დაკავშირებით მარტის 17 რიცხვში პროკურატურაში საჩივარი შევიტანე და მოვითხოვე სისხლის სამართლის კოდექსის შესაბამისი მუხლის მიხედვით ჩემს მიმართ განზრახ ჩადენილი დანაშაულის გამოძიება” – თქვა ქათამაძემ სხომაზე.
Loading ...