ვითარება უკრაინაში – გათავისუფლებულია 8 დასახლებლი პუნქტი

უკრაინის შეიარაღებული ძალების გენერალური შტაბის მონაცემებით, გასულ 24 საათში, რუსმა სამხედროებმა უკრაინის ტერიტორიაზე, სამოქალაქო და სამხედრო ობიექტებზე განახორციელეს 5 სარაკეტო და 8 საავიაციო დარტყმა და 65-ზე მეტი შეტევა ზალპური ცეცხლის რეაქტიული სისტემების გამოყენებით. გენშტაბის მიერ დილით გამოქვეყნებული ინფორმაციით, საავიაციო და სარაკეტო დარტყმების შედეგად, დაზარალდა 30-ზე მეტი დასახლებული პუნქტი დონეცკის, ხარკოვის, ზაპოროჟიეს და დნეპროპეტროვსკის ოლქებში.

უკრაინული სარდლობის ცნობით, ბოლო 24 საათში, თავდაცვის ძალებმა რუსეთის ქვედანაყოფების შეტევები მოიგერიეს დონეცკის ოლქის 8 დასახლებულ პუნქტთან.

გენშტაბის ინფორმაციით, გასულ 24 საათში უკრაინის არმიის ავიაციამ განახორციელა 15-ზე მეტი დარტყმა და დადასტურებულია მოწინააღმდეგის სამხედრო ტექნიკის და შეიარაღების თავმოყრის 12 ადგილის და 4 საზენიტო-სარაკეტო კომპლექსის განადგურება. სარდლობის ცნობითვე, ჰაერსაწინააღმდეგო თავდაცვის ძალებმა ჩამოაგდეს 9 უპილოტო საფრენი აპარატი, ხოლო სარაკეტო და საარტილერიო ქვედანაყოფებმა გაანადგურეს მოწინააღმდეგის 2 მართვის პუნქტი, ცოცხალი ძალის და სამხედრო ტექნიკის თავმოყრის 14 ადგილი და საბრძოლო მასალების საწყობი.

რუსული ძალების მიერ ზაპოროჟიეზე განხორციელებული სარაკეტო თავდასხმის შედეგად დაშავებული ორი ადამიანი გარდაიცვალა, – ამის შესახებ ზაპოროჟიეს საოლქო-სამხედრო ადმინისტრაციის ხელმძღვანელი, ალექსანდრ სტარუხი იუწყება.

მისი თქმით, ნანგრევების ქვეშ მინიმუმ 5 ადამიანი იმყოფება.

„სახლების ნანგრევებში სულ მცირე 5 ადამიანია. ბევრი მოქალაქე მაშველებმა გადაარჩინეს, მათ შორის 3 წლის გოგონა, რომელიც საავადმყოფოშია გადაყვანილი“, – აღნიშნა სტარუხმა.

მისი თქმით, ადგილზე სამაშველო ოპერაცია გრძელდება.

შეგახსენებთ, რუსულმა ძალებმა დღეს დილით ზაპოროჟიეში ინფრასტრუქტურულ ობიექტებსა და საცხოვრებელ შენობებს რაკეტები ესროლეს.

უკრაინის შეიარაღებული ძალების გენერალური შტაბი რუსი ოკუპანტების სამხედრო დანაკარგის შესახებ განახლებულ ინფორმაციას ავრცელებს. მონაცემები მოიცავს 24 თებერვლიდან 6 ოქტომბრამდე პერიოდს.

გენშტაბის ცნობით, ოკუპანტების სამხედრო დანაკარგი ასეთია:​

• ჯარისკაცი – დაახლოებით 61 330;
• ტანკი – 2 449;
• ჯავშანტექნიკა – 5 064;
• საარტილერიო სისტემა – 1 424;
• სარაკეტო სისტემა – 344;
• საზენიტო საბრძოლო სისტემა – 176;
• თვითმფრინავები – 264;
• ვერტმფრენი – 225;
• ოპერატიულ-ტაქტიკური უპილოტო საფრენი აპარატი – 1 074;
• საკრუიზო რაკეტები – 246;
• საავტომობილო ტექნიკა და საწვავის ავზები – 3 854;
• გემი/ნავი/კატარღა – 15;
• ​სპეციალური აღჭურვილობა – 134.