ვიდეო – ხმაური და დაპირისპირება ოზურგეთის საკრებულოს სხდომაზე

ხმაური და დაპირისპირება იყო დღეს ოზურგეთის მუნიციპალიტეტის საკრებულოში. სხდომის დაწყებისთანავე ერთიანი ნაციონალური მოძრაობის წევრმა თათია ნიკოლაიშვილმა ოზურგეთის მერიის ერთერთი პროგრამის ბიუჯეტი გააპროტესტა, რომლითაც ერთი რქოსანი პირუტყვის გადადენა 500 ლარი ჯდება, მთლიანი ბიუჯეტი კი 90 000 ლარს შეადგენს. ეს კი იმ ფონზე ხდება, როცა ოზურგეთში ათასობით სოციალურად დაუცველია და საკვებ პროდუქტებზე ფასი კატასტროფულად იზრდება – აცხადებს ნიკოლაიშვილი.

მოგვიანებით კი სხდომაზე ხელახალი დაპირისპირება ურეკის ტერიტორიაზე მიწის გასხვისების საკითხმა გამოიწვია. ნაციონალური მოძრაობის ფრაქციის თავმჯდომარის დავით მჟავანაძის განცხადებით აღნიშნული მიწის გასხვისება, რომელიც 2 ჰექტარს შეადგენს ბიძინა ივანიშვილის ინტერესებში შედის და იქ მოსახლეობის სურვილებს არავინ გაითვალისწინებს. იქ უნიკალური ტყეა, ბიჭვინთის ფიჭვი და მას განადგურება ემუქრება. აღნიშნულ ბრალდებებს უსაფუძვლო უწოდა ,,ქართული ოცნების” ფრაქციის თავმჯდომარემ, მარიკა ჩხიკვიშვილმა. მან აღნიშნა, რომ ნაციონალური მოძრაობის ინტერესია ქვეყნის აღმშენებლობა შეაფერხონ. მათ ელემენტარული არითმეტიკა არ იციან.