ვიდეო – ახალი დეტალები რუსთავი-თბილისის გზაზე მომხდარ ავარიასთან დაკავშირებით, რომელსაც სამი ადამიანი ემსხვერპლა

რუსთავის-ლილოს გზაზე მომხდარი ავარიის დროს 3 რუსთაველი დაიღუპა, 2 კი დაშავდა. 

საინფორმაციო სააგენტო “ინფო რუსთავის” ინფორმაციით, “ჰიუნდაის” მარკის მსუბუქი ავტომობილით ორი ახალგაზრდა ძმა 3 შუახნის ქალთან ერთად რუსთავიდან ლილოში მიდიოდა. ხუთივე მათგანი ლილო მოლში იყო დასაქმებული და სამსახურში ხშირად ერთად დადიოდნენ.

ავტოსაგზაო შემთხვევის დროს ერთმანეთს “ჰიუნდაის” მარკის მსუბუქი ავტომობილი, დისტრიბუციის მანქანა და სატვირთო შეეჯახა. შემთხვევის დროს “ჰიუნდაის” მარკის ავტომობილში მსხდომი ახალგაზრდა კაცი და 2 შუახნის ქალი გარდაიცვალა, ორი დაშავებული კი, 36 წლის კაცი და 66 წლის ქალი, სასწრაფო დახმარების ეკიპაჟმა კლინიკა რუსთავში გადაიყვანა.

როგორც საინფორმაციო სააგენტო “ინფო რუსთავს” სამედიცინო დაწესებულების კლინიკურმა დირექტორმა ლევან მჭედლიძემ განუცხადა, მძიმედ ფასდება 36 წლის კაცის მდგომარეობა, პაციენტი იმყოფება მართვით სუნთქვაზე, აღენიშნება თავის ტვინის დაზიანება და მრავლობითი მოტეხილობა. 66 წლის ქალს მრავლობითი მოტეხილობა აღენიშნება, მისი მდგომარეობა მძიმეა, თუმცა სტაბილური. ორივე მათგანი რეანიმაციულ განყოფილებაშია მოთავსებული.

მომხდართან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 276-ე მუხლით მიმდინარეობს.