''ვერ მოვნახე არგუმენტები'' – პრეზიდენტმა დეკანოზი მამალაძე არ შეიწყალა

პრეზიდენტმა სალომე ზურაბიშვილმა დეკანოზი გიორგი მამალაძე არ შეიწყალა. მიუხედავად წმინდა სინოდის თხოვნისა,საგანგებო ბრიფინგზე ზურაბიშვილმა განაცხადა, რომ შეწყალება ეკლესიაში და სახელმწიფოს მიერ შეწყალება ერთმანეთისგან არსებითად განსხვავდება. დეკანოზ გიორგი მამალაძის შეწყალებისთვის კი, ზურაბიშვილის განმარტებით, საკმარისი არგუმენტი არ არსებობდა.

” მე ბოლომდე მოვისმინე ადვოკატების არგუმენტები, დეტალურად გავეცანი წმინდა სინოდის შუამდგომობას და მივიღე გადაწყვეტილება, რომელზეც მთლიანად ვიღებ პასუხისმგებლობას. ვერ მოვნახე არგუმენტები, რატომ უნდა დაშვებულიყო გამონაკლისი დეკანოზ გიორგი მამალაძის საქმეზე. ჩემი ეს გადაწყვეტილება ეფუძნება საზოგადოებრივი სიმშვიდის უზრუნველყოფას, რადგან საქართველოს მოსახლეობის ყველაზე დიდი ნაწილი ასეთი დანაშაულისთვის შეწყალებას ვერ გაიგებს და ვერ გაიზიარებს, ასეთი დაყოფა და დაპირისპირება კი საფრთხეს შეუქმნის საქართველოს მომავალს. – განაცხადა ზურაბიშვილმა.

პრეზიდენტის განმარტებით, შეწყალება ხუთ ადამიანს შეეხო, რომელთა სახელები პრეზიდენტის ოფიციალურ გვერდზე მალე გამოქვეყნდება. ზურაბიშვილის განცხადებით, ხსენებული გადაწყვეტილება მთლიანად მის მიერ არის მიღებული და პასუხისმგებლობასაც თავად იღებს.