პარტიას საქართველოსთვის ბათუმში ნაქირავებ ოფისს ატოვებინებენ. აჭარაში პარტიის რაიონული ორგანიზაციის თავმჯდომარის, ირაკლი მიქელაძის თქმით, ადამიანები მათთვის ოფისების მიქირავებას მუქარისა და შანტაჟის გამო ვერ ახერხებენ.
“ჩვენ ამ ადამიანთან გუშინაც კი გვქონდა კომუნიკაცია და ეს ადამიანი ღიად აფიქსირებდა მხარდაჭერას ჩვენი გუნდისა და პარტიის მიმართ, ფაქტობრივად, მხოლოდ დღეის შეიცვალა მისი პოზიცია. მიზეზად კი დასახელდა იგივე ფაქტი, რომელიც მედიის საშუალებებით რამდენიმე დღის წინ გავრცელდა და, რა თქმა უნდა, ეს ყველაფერი არის სრული სიცრუე.
ჩვენ მთელი რეგიონის მასშტაბით ვაპირებთ ძალიან ბევრი ოფისის გახსნას და, სამწუხაროდ, ეს არ არის პირველი შემთხვევა, როდესაც ადამიანები ღიად გვიფიქსირებენ, რომ მიუხედავად მათი დიდი სურვილისა, მოგვაქირაონ ოფისი, ვერ ახერხებენ იმ დაშინებისა და შანტაჟის გამო, რომელიც მათ მიმართ ხორციელდება. ჩვენ აბსოლუტურად გვესმის მისი და თანავუგრძნობთ, ჩვენ, რა თქმა უნდა, გავითვალისწინებთ მის აზრს და რთულ მდგომარეობას, ოფისს დავტოვებთ”. – თქვა მიქელაძემ.
სამთავრობო ტელეკომპანია იმედმა გაავრცელა ინფორმაცია, რომ შენობის მეპატრონისთვის გიორგი გახარიას პარტიისთვის ოფისის დატოვების მიზეზი “ბოლო დროს განვითარებული მოვლენები და მედიაში გაშუქებული ინფორმაცია” გახდა. ტელეკომპანიის თანახმად, საუბარია ყოფილ პრემიერსა და ერთიან ნაციონალურ მოძრაობას შორის შესაძლო კავშირზე.
პარტიამ საქართველოსთვის ბათუმში რეგიონული ოფისი 14 ივნისს გახსნა.
Loading ...