ავსტრიის დედაქალაქ ვენაში საქართველოს 35 წლის მოქალაქე დააკავეს, რომელიც არალეგალურ კოსმეტიკურ ოპერაციებს ატარებდა.
“მოყვარული ქირურგის” შესახებ ავსტრიის პოლიციას მას შემდეგ დაუკავშირდნენ, როდესაც 58 წლის ქალი დაკავებულის ნაქირავები ბინიდან კლინიკაში სერიოზული დაზიანებებით გადაიყვანეს. დაზარალებული ეჭვმიტანილთან, სავარაუდოდ, “ნიკაპის აწევის ან გადაჭიმვის” მიზნით იმყოფებოდა.
პოლიციის ცნობით, დაკავებული, რომელიც აცხადებს, რომ საქართველოში პლასტიკურ ქირურგად მუშაობდა, არალეგალური ოპერაციებისთვის დღიურად ნაქირავებ ბინას იყენებდა.
მათივე ინფორმაციით, ეჭვმიტანილმა ქალს ყელის, ყურებისა და ყბის არეში რამდენიმე ჭრილობა გაუკეთა, რამაც ყელის არეში სისხლდენა და სუნთქვის გართულება მოჰყვა. ამის შემდეგ, დაკავებულმა ქალს, სავარაუდოდ, მედიკამენტი გაუკეთა, თუმცა, ადგილზე სასწრაფოს გამოძახება საჭირო მაინც გახდა.
სასწრაფო კი ადგილზე მისვლისთანავე პოლიციას დაუკავშირდა. 58 წლის ქალის მდგომარეობა ამჟამად სტაბილურია.
პოლიციის ცნობით, ბინის ჩხრეკისას სამართალდამცველებმა ამოიღეს როგორც ქირურგიული ინსტრუმენტები, სამედიცინო და ქირურგიული აღჭურვილობა, სადეზინფექციო და სტერილიზაციის მასალები, ასევე, კოსმეტიკური ოპერაციების ფასების სია და საინფორმაციო მასალა ოპერაციის პროცედურების შესახებ.
პოლიციის განცხადებით, დაკავებულ მოყვარულ ქირურგს ავსტრიაში სამედიცინო სფეროში მუშაობისთვის აუცილებელი ლიცენზია არ აღმოაჩნდა. რაც შეეხება მის “საქართველოში ქირურგად მუშაობას”, ამის შესახებ გამოძიება გრძელდება.
Loading ...