ვატიკანმა ოფიციალურად გამოაქვეყნა პაპ ფრანცისკეს ანდერძი, რომელშიც წმინდა მამა აღნიშნავს, რომ სურს დაკრძალული იყოს რომში, ბაზილიკად ცნობილ წმინდა მარიამ დიდის ტაძარში (St. Mary Major), სადაც უკვე განისვენებს ექვსი პაპი.
ანდერძის მიხედვით, პაპს სურს, მისი განსასვენებელი იყოს მიწაში, უბრალო და ყოველგვარი მორთულობის გარეშე, წარწერით — “Franciscus”.
“მინდა, ჩემი მიწიერი გზა დასრულდეს ამ უძველეს მარიანულ საკურთხეველთან,” — ვკითხულობთ დოკუმენტში, რომელიც თარიღდება 2022 წლის 29 ივნისით. ამ დღეს, რომში წმინდანთა პეტრესა და პავლეს ხსენების დღეს, ფრანცისკემ აღნიშნა, რომ აღნიშნულ ტაძარში ლოცულობდა ყველა თავისი აპოსტოლური მოგზაურობის დასაწყისსა და დასასრულს, მათ შორის 2013 წელს, როდესაც პაპად არჩევის პირველივე დღეს ტაძარში ჩუმად ჩავიდა ლოცვისთვის.
იგივე ტაძარი მოინახულა ყოველი ჰოსპიტალიზაციის შემდეგაც, მათ შორის მიმდინარე წლის 23 მარტს, ჯემელის საავადმყოფოში გატარებული 38 დღის შემდეგ.
ანდერძში ფრანცისკე განმარტავს, რომ სურს მისი საფლავი იყოს პავლინეს კაპელის გვერდით, სადაც ეს იკონა მდებარეობს, რათა მადლობა გადაუხადოს ღვთისმშობელს “მისი თვინიერი და დედობრივი მზრუნველობისთვის.”
ანდერძის ბოლოს, პაპი წერს: “გთხოვ უფალო, მიეცი დამსახურებული საზღაური მათ, ვინც მიყვარდა და ვინც ლოცვაში გამიხსენებს.”
ვატიკანმა ასევე გაავრცელა პაპის სიკვდილის მოწმობაც. ოფიციალური ინფორმაციით, ფრანცისკე გარდაიცვალა დილით 7:35 საათზე ცერებრალური ინსულტის შედეგად, რომელმაც კომა და “შეუქცევადი” გულის გაჩერება გამოიწვია.
დოკუმენტში მითითებულია, რომ პაპს აწუხებდა არტერიული ჰიპერტენზია, მრავალფოკალური ბრონქიექტაზია, მეორე ტიპის დიაბეტი და პერიოდული მწვავე რესპირატორული უკმარისობა.
ფრანცისკეს ჯანმრთელობის პრობლემები საჯაროდაც იყო ცნობილი: 2021 წელს მას ჩაუტარდა კოლონის ოპერაცია, რაც გახდა მისი პირველი ჰოსპიტალიზაციის მიზეზი.
პაპმა პირველად გასულ წელს მექსიკურ ტელეინტერვიუში გაამხილა, რომ სურდა წმინდა მარიამ დიდის ბაზილიკაში დაკრძალვა “დიდი ღვთისმშობლისადმი ერთგულების გამო.”
ფრანცისკეს გარდაცვალებით დასრულდა 12-წლიანი პაპობა, რომელიც გამორჩეული იყო უბრალოებით, სოციალური სამართლიანობის მხარდაჭერით და დიალოგისკენ მუდმივი მოწოდებით.
Loading ...