გიორგი შაქარაშვილის საქმის დამოუკიდებელი ექსპერტის, ალექსანდრე გეჯაძის თქმით, შაქარაშვილის ჩანთიდან, რომელიც მდინარის პირას იპოვეს, 140-მდე დნმ-ს ნიმუშია აღებული. როგორც ექსპერტი ამბობს, ყველა იმ ადამიანისგან, რომელიც უშუალო, თუ გარე კონტაქტში იყო გიორგი შაქარაშვილთან, დნმ-ს ნიმუშები ასევე აღებულია.
თუმცა, ჩანთაზე აღმოჩნდა ისეთი დნმ-ს ობიექტი, რომელიც საქმის არცერთ ფიგურანტს არ ეკუთვნის.
“ჩანთასთან მიმართებით, ბუნებრივია, ეს ყველასთვის ცნობილია და ბატონმა მირიანმაც გააჟღერა, გამოძიებამაც გააჟღერა. სადღაც 140-მდე კვლევის ობიექტია აღებული [ჩანთიდან] დნმ-კვლევასთან მიმართებაში. ყველა ფიგურანტისგან, უშუალო კონტაქტში მყოფისგანაც და გარეშე კონტაქტში მყოფებისგანაც აღებულია ნიმუშები, დნმ-კვლევა ჩატარდა და აღმოჩნდა იქ ისეთი დნმ ობიექტი, რომელიც არავის მიეკუთვნება, ესე იგი, არის ვიღაც პიროვნება, ვინც ამ საქმეში არ ფიგურირებს და რატომ არ ფიგურირებს, ეს უკვე კითხვის ნიშნის ქვეშაა, ბუნებრივია”. – თქვა ალექსანდრე გეჯაძემ TV პირველისთვის მიცემულ კომენტარში.
გიორგი შაქარაშვილის ცხედარი 22 ივნისს, ოთხდღიანი ძებნის შემდეგ, მდინარე არაგვში იპოვეს. საქმეზე 17 ადამიანია დაკავებული, მათ აქამდე მხოლოდ ჯგუფურ ძალადობას, ძალადობის ორგანიზებასა და თავისუფლების უკანონო აღკვეთას ედავებოდნენ.
თუმცა, ექსპერტიზის დასკვნის შემდეგ პროკურატურამ გიორგი შაქარაშვილის საქმეზე გამოძიება დამამძიმებელ გარემოებებში ჯგუფური განზრახ მკვლელობის მუხლითაც დაიწყო – 109-ე მუხლის მეორე ნაწილი 13-დან 17 წლამდე პატიმრობას ითვალისწინებს.
Loading ...
