“ნიუ ჰოსპიტალსის” ბავშვთა ჯანმრთელობის ცენტრის ხელმძღვანელი, დავით ციბაძე ამბობს, რომ ვაკის პარკში დენის დარტყმით დაშავებული ბავშვის მდგომარეობა დამაკმაყოფილებელია და შესაძლოა, ის დღეს გაწერონ კლინიკიდან. ამის შესახებ ექიმმა დღეს, 16 ოქტომბერს კლინიკასთან გააკეთა განცხადება.
“მდგომარეობა დამაკმაყოფილებელია. უკვე გავიდა ის პერიოდი, რომელიც სხვადასხვა რისკებთან იყო დაკავშირებული. ამ წუთისთვის გარკვეული კვლევებისა და კონსულტაციების შემდეგ გადავწყვეტთ, სავარაუდოდ, აღარ იქნება მისი ინტენსიურ თერაპიაში გაჩერება საჭირო. მისი მკურნალობის გაგრძელება შესაძლებელი იქნება ამბულატორიულად. დღეს, ალბათ დღის განმავლობაში სახლში გავუშვებთ”, – უთხრა დავით ციბაძემ ჟურნალისტებს.
13 ოქტომბერს, დღის პირველ ნახევარში, თბილისში, ვაკის პარკის შადრევანში ჩავარდნილი ბურთის ამოსაღებად ჩასულ 3 ბავშვს დენმა დაარტყა.
მათგან ერთი გარდაიცვალა, იაშვილის კლინიკაში გადაყვანილი ერთ-ერთი დაშავებულის, 13 წლის ბავშვის მდგომარეობა კი მალევე გაუმჯობესდა და ის გაწერეს კლინიკიდან.
თვითმხილველი, რომელიც უშუალოდ შეესწრო ვაკის პარკში მომხდარ უბედურ შემთხვევას, ამბობს, რომ მოზარდების წყლიდან ამოყვანა რთული იყო, რადგან დენი მათ დასახმარებლად ჩასულ კაცსაც არტყამდა.
შინაგან საქმეთა სამინისტრომ გამოძიება დაიწყო სისხლის სამართლის კოდექსის 240-ე მუხლის პირველი ნაწილით (უსაფრთხოების წესების დარღვევა). როგორც მინისტრის მოადგილემ განმარტა, გამოძიების მსვლელობისას დაზუსტდა კვალიფიკაცია და გამოძიება გრძელდება სისხლის სამართლის კოდექსის 240-ე პრიმა მუხლის პირველი და მეორე ნაწილით, რაც გულისხმობს ელექტროობიექტზე უსაფრთხოების წესების დარღვევას, რასაც მოჰყვა ადამიანის სიცოცხლის მოსპობა.
Loading ...
