ექიმის დაკავება და პატიმრობა არის მისი მხრიდან უდიდესი თავგანწირვა და თავდადება იქ მცხოვრები მოქალაქეების უფლებების დასაცავად საერთაშორისო საზოგადოების ყურადღების მისაპყრობად! – ნინო ლომჯარია

 სახალხო დამცველი ვაჟა გაფრინდაშვილის პატიმრობასთან დაკავშირებით განცხადებას ავრცელებს –

“ბ-ნი ვაჟა გაფრინდაშვილის პატიმრობამ საერთაშორისო საზოგადოებას და არაპოლიტიკურ პროფესიულ საერთაშორისო გაერთიანებებს კიდევ ერთხელ და მთელი სიმძაფრით დაანახა ის იზოლაცია, უკანონობა, ჯანდაცვის და სხვა სასიცოცხლო სერვისებზე წვდომის აკრძალვა, რაშიც ჩვენ თანამოქალაქეებს უწევთ ცხოვრება ცხინვალის რეგიონში. ექიმის დაკავება და პატიმრობა არის მისი მხრიდან უდიდესი თავგანწირვა და თავდადება იქ მცხოვრები მოქალაქეების უფლებების დასაცავად საერთაშორისო საზოგადოების ყურადღების მისაპყრობად!

რეალური საფრთხის მიუხედავად, ბრალის და შესაბამისად სახელმწიფო საზღვრის არაღიარება ექიმის მხრიდან სამოქალაქო გმირობა და ეროვნული ღირსების დაცვაა!

დღეს სახელმწიფოს ამოცანა, რა თქმა უნდა მისი უსაფრთხოდ გათავისუფლებაა, თუმცა, ბ-ნი ვაჟას საქმით არ დამთავრდება ჩვენი თანამოქალაქეების უკანონო დაკავებების ფაქტები. ამიტომ, ვეთანხმები ექიმის ოჯახს იმ საკითხში, რომ საჭიროა უფრო კოორდინირებული ქმედებები და კომუნიკაცია სახელმწიფო უწყებებსა თუ არასახელმწიფო ორგანიზაციებს შორის, რათა ყველამ თავისი კომპეტენციის ფარგლებში, კოორდინირებულად იმოქმედოს ოკუპირებულ ტერიტორიებსა და საოკუპაციო ხაზზე მცხოვრები ჩვენი მოქალაქეების თავისუფლებებისა და უსაფრთხოების დასაცავად.”