“ეს იგივეა, ქაშვეთი და სიონი ერთ ადგილას გადაიტანო”- პროფესორის კითხვები თსუ-სთან სტუ-ის შეერთებაზე

საქართველოს ტექნიკური უნივერსიტეტის პროფესორ მაია ბენიას განცხადებით, საქართველოში წერტილი უნდა დაესვას ერთპიროვნულ გადაწყვეტილებას.

ამის შესახებ მან BMGTV-ის გადაცემა „წერტილში“ განაცხადა, სადაც ინტერვიუს მთავარი თემა თბილისის სახელმწიფო უნივერსიტეტთან საქართველოს ტექნიკური უნივერსიტეტის შეერთების საკითხი იყო.

„ქართული ოცნების“ მთავრობის პოლიტიკურმა გადაწყვეტილებამ, რომელიც თბილისის სახელმწიფო უნივერსიტეტისა (თსუ) და საქართველოს ტექნიკური უნივერსიტეტის (სტუ) გაერთიანებას გულისხმობს, აკადემიურ წრეებში პროტესტი გამოიწვია.

„ვინმემ რომ მითხრას, ქაშვეთი და სიონი სადმე ერთ ადგილას უნდა გადავიტანოთ, ყველა ერთად ილოცებთ, ისევ ტაძარი იქნება, მაგრამ ქაშვეთი და სიონი აღარ არის აქტუალურიო – ამას ვერასოდეს გავიგებ. აი, მართლა ასეთი განცდა მაქვს თსუ-ის და ტექნიკური უნივერსიტეტის [შეერთების საკითხის] მიმართ“, – აცხადებს სტუ-ის პროფესორი.

პროფესორის მხრიდან უმაღლესი განათლების რეფორმის მთავარი კრიტიკა მის გაუმჭვირვალობას და აკადემიური პერსონალის იგნორირებას უკავშირდება.

ამასთან, მაია ბენია არ უარყოფს, რომ უმაღლესი განათლების სისტემა, მათ შორის საქართველოს ტექნიკური უნივერსიტეტი რეფორმებს საჭიროებს და არსებული მდგომარეობა შორს არის იდეალურისგან.

„გასაუმჯობესებელი რომ არის და ძირეული რეფორმა რომ არის ჩასატარებელი, ამაზე ვინ დავობს?! რა თქმა უნდა, არის საჭირო, მაგრამ ხომ შეიძლებოდა რაღაც პუნქტები მოლაპარაკების შედეგად გამოკვეთილიყო?!“ – აღნიშნავს პროფესორი.

ის მიიჩნევს, რომ სისტემის ტრანსფორმაცია არა მექანიკური შერწყმით, არამედ მეცნიერულ კონცეფციაზე დაფუძნებული დიალოგით უნდა დაწყებულიყო. სტუ-ის ლექტორისთვის გაუგებარია, რატომაა პანაცეა მაინცდამაინც ტექნიკური უნივერსიტეტის გაუქმება, როცა შესაძლებელი იყო ხარისხის ამაღლებაზე ზრუნვა ავტონომიურობის შენარჩუნებით.

მაია ბენია ერთ-ერთია იმ 70-მდე პროფესორ-მასწავლებელს შორის, რომელიც ორი დღის წინ ამ თემაზე განათლების მინისტრის მოადგილე ზვიად გაბისონიას შეხვდა და კითხვებიც დაუსვა, მაგრამ კონკრეტული პასუხები ვერ მიიღო.

„ზვიად გაბისონია ჩვენიანია, 17 წელი ტექნიკურ უნივერსიტეტში მუშაობდა და ემოციურად ესმის ჩვენი, მაგრამ მისი პასუხი იყო ერთი: ეს არის პოლიტიკური გადაწყვეტილება. ჩვენ ვკითხულობთ – თუ ჩვენ შეგვიძლია კურიკულუმების შედგენა, სილაბუსების გაწერა, სადაც მიზანი და შედეგია მოცემული, რატომ არ შეგვიძლია ვთქვათ, როგორ იფუნქციონიროს უნივერსიტეტმა?! სამინისტროს კადრები ხომ არ არიან მეცნიერები?! ამ რეფორმის კონცეფცია ისე დაიდო, რომ მასში არც თსუ-დან, არც ილიაუნიდან და არც ტექნიკური უნივერსიტეტიდან არავინ ყოფილა ჩართული“, – აცხადებს მაია ბენია.

აღსანიშნავია, რომ პარლამენტში გამოსვლისას მინისტრის მოადგილემ ვერ დაასახელა ვერცერთი ექსპერტი, ვინც უმაღლესი განათლების რეფორმაზე იმუშავა.

ამას გარდა, განათლების სამინისტროს არგუმენტი, რომ შერწყმით კადრები მაქსიმალურად შენარჩუნდება, სტუ-ს პროფესორისთვის ლოგიკას მოკლებულია. „თუ ყველაფერი ნარჩუნდება, თუ ყველა ადგილს ვინარჩუნებთ, მაშინ რატომ ჰქვია ამას რეორგანიზაცია და რა ეკონომიკურ ეფექტს ველოდებით?!“, – კითხვას სვამს მაია ბენია.

პროფესორი მოუწოდებს ხელისუფლებას, გაითვალისწინოს დასავლური ქვეყნების გამოცდილება, სადაც უნივერსიტეტების კონსორციუმების შექმნა „ქვემოდან“, თავად უნივერსიტეტების ინიციატივით მოდის და არა „ზემოდან“ თავსმოხვეული ბრძანებით.

„სორბონაში შერწყმის პროცესს 3-დან 6 წლამდე გარდამავალი პერიოდი ჰქონდა. ფინეთშიც იგივე ვადები იყო. ჩვენთან რატომ არ შეიძლება იყოს თუნდაც 2-დან 4 წლამდე პერიოდი?! რატომ ვიგონებთ ახალ ველოსიპედს?! ევროკავშირთან აგრარულ რეფორმებზე 10-წლიანი გარდამავალი პერიოდი მოგვცეს, რადგან ეს გონივრულია. აქ კი ყველაფერი ხისტად და დაჩქარებულად ხდება“, – აცხადებს ის.

პროფესორისთვის გაუგებარია, რატომ უნდა გაქრეს საუკუნოვანი ბრენდის სახელი მაშინ, როდესაც მეზობელი ქვეყნები (აზერბაიჯანი, თურქეთი) პირიქით – ახალ პოლიტექნიკურ ცენტრებს აფუძნებენ.

„წერტილთან“ ინტერვიუში მაია ბენიამ პარალელი გაავლო წარსულთანაც და აღნიშნა, რომ უნივერსიტეტების მექანიკური გაერთიანება სოციალურ და ფსიქოლოგიურ კრიზისს გამოიწვევს. მისი თქმით, აკადემიური საზოგადოება ჯერ კიდევ ვერ ივიწყებს წინა ხელისუფლების დროს განხორციელებულ „ოპტიმიზაციას“, როდესაც არაერთი ინსტიტუტი გაუქმდა.

„ჩვენ ეს ერთხელ უკვე გამოვიარეთ, როდესაც ასე ხელაღებით გაიყიდა ზოოვეტი, პუშკინი, უცხო ენები, სასოფლო… ამ პროცესებს ადამიანების სიცოცხლე შეეწირა, მათ შორის მამაჩემის და მისი თაობის მეცნიერების. მაშინ ტექნიკურმა უნივერსიტეტმა შეიკედლა ეს ხალხი, ახლა კი ისე გამოდის, რომ ეს ფაკულტეტები მეორე დევნილობაში გადადიან. ადამიანები შოკში არიან, ხალხი ტირის – ქალიან-კაციანად. ეს ჩვენი სახლია, ჩვენი იდენტობაა“, – აცხადებს პროფესორი.

მაია ბენიას ინფორმაციით, მიმდინარე კვირის ბოლომდე საქართველოს ტექნიკური უნივერსიტეტის პროფესორ-მასწავლებლები განათლების მინისტრ გივი მიქანაძეს შეხვდებიან. ამასთან, პროფესორები ითხოვენ იმ დოკუმენტის წარდგენას, რომელიც ორი უნივერსიტეტის შერწყმის აუცილებლობას ასაბუთებს.

„ჩვენ ვითხოვთ გადმოგვიგზავნონ დოკუმენტი [სადაც ორი უნივერსიტეტის გაერთიანების აუცილებლობაა დასაბუთებული], რათა მინისტრთან შეხვედრამდე განვიხილოთ. იქნებ რაღაც ისეთი წერია… უნივერსიტეტებს აქვთ 50-წლიანი განვითარების გეგმა და ხომ შეიძლება ერთწლიანი გეგმა მაინც გვაჩვენონ, თუ რა მოხდება, როგორ მოხდება და იმ პუნქტებში ჩვენც რაღაცა ჩვენი არგუმენტები ჩავდოთ – ზოგში დაგეთანხმოთ, ზოგში – არა… პროფესორმა ლევან გორდეზიანმა კარგად თქვა, საკანში რომ იჯდე და ნომრის მაგივრად შენი გვარი დააწერონ, შინ ხომ არ იქნებიო?! – აი, მართლა ეგეთი შეგრძნება მაქვს – არაუშავს, მაინც უნივერსიტეტი იქნებაო. არ ვიცი…“, – აცხადებს სტუ-ის პროფესორი მაია ბენია.