ეროვნული ბანკი კომერციულ ბანკებს ირანთან დაკავშირებით აფრთხილებს

საქართველოს ეროვნული ბანკი შესაძლო სანქციებზე განცხადებას ავრცელებს.

ირანს ათწლეულებია შეერთებული შტატების სანქციები ადევს.

მესამე მხარის მიერ სანქციების დარღვევა, თავად მესამე მხარის დასანქცირებას იწვევს. თუნდაც მცირე ზომის ბაკის დასანქცირება საერთო ეკონომიკურ ფონს გააუარესებს.

ბოლო პერიოდში სატრანსპორტო ხარჯების შემცირების მიზნით აზიის ზოგიერთი ქვეყნიდან ირანის სატრანზიტო დერეფნის გამოყენების შემთხვევები დაფიქსირდა. აღნიშნულ ტვირთებთან დაკავშირებული საბანკო ანგარიშსწორება შესაძლოა სანქციების დარღვევად ჩაითვალოს. მსგავსი ტიპის გარიგებები ქვეყნის გარეთ უცხოურ ვალუტაში ტრანზაქციების შეფერხების რისკს წარმოშობს.

ეროვნული ბანკი განმარტავს რომ კომერციულ ბანკებს ირანთან დაკავშირებით გაძლიერებული პრევენციული ზომების გატარება ევალებათ. სანქციების დარღვევის რისკის არსებობის შემთხვევაში ბანკებმა მომსახურებაზე უარი უნდა განაცხადონ. ეროვნული ბანკი კომერციულ ბანკებთან ერთად ახალ დებულებაზე მუშაობს, რომლის შესრულება სავალდებულო იქნება.

დებულება მიზნად მონიტორინგის გაძლიერებასა და რისკების შემცირებას ისახავს. ირანში მომხდარი ისლამური რევოლუციის შემდეგ, ირანის ურთიერთობა დასავლეთთან მკვეთრად გაუარესდა და ქვეყანა საერთაშორისო სანქციების ქვეშ მოექცა. პერიოდულად, მაგალითად ობამას პრეზიდენტობის დროს ურთიერთობები მცირედით უმჯობესდებოდა, მაგრამ გარღვევა ვერ მოხერხდა.

რუსეთის უკრაინაში შეჭრის შემდეგ ირანისთვის სანქციების შემსუბუქება და ნავთობის ექსპორტზე ემბარგოს მოხსნის იმედი ისევ გაჩნდა, მაგრამ მოლაპარაკებებმა შედეგი ვერ გამოიღო.