ხობში ოქტომბრის ბოლო კვირას კლიმატის კვირეული გაიმართა. პრეზენტაციების შემდეგ მსჯელობა მრგვალი მაგიდის ფორმატში შედგა და გაიმართა სადისკუსიო პანელი. კლიმატის ცვლილებაზე იმსჯელეს და კლიმატგონივრული უნარების გამომუშავების აუცილებლობაზე შეთანხმდნენ გარემოსდაცვითი ორგანიზაციები, სამოქალაქო საზოგადოება, ახალგაზრდობა და სკოლები, ბიზნესები და მეწარმეები, აკადემიური წრეები და ექსპერტები, მედია და ინფლუენსერები, თემის ლიდერები, ფერმერები, ქალთა ჯგუფები და ადგილობრივი მოსახლეობის წარმომადგენლები.
მდგრადი საარსებო წყაროების შექმნა კლიმატის ცვლილების ფონზე ერთ-ერთი აქტუალური და მნიშვნელოვანი საკითხია. ბუნებრივია, რომ ყურადღება ამ თემასაც დაეთმო. კერძოდ, კლიმატის კვირეულის მონაწილეებმა ველზეც იმუშავეს და ესტუმრნენ პროექტის ფარგლებში შექმნილ დემო-ფერმებს. დემონსტრაცია ჩატარდა კომპოსტირების, წვეთოვანი სარწყავი სისტემის, წყლის დაგროვების სისტემისა და მზისა და ბიომასის ტექნოლოგიების გამოყენებით.
თორსაში დავით კვარაცხელიამ სტუმრებს ენერგოეფექტური ტექნოლოგიები წარუდგინა. ერთ-ერთი მათგანია ჩირის ენერგოეფექტური საშრობი.
მზის ენერგიაზე წყალს ათბობენ კიდეც. როგორც თორსელმა დავით კვარაცხელიამ სტუმრებს აუხსნა, ეს დანადგარი წლის ნებისმიერ დროს მუშაობს და წყლის გასათბობად საჭირო ხარჯს 25%-მდე ამცირებს. დანადგარის ღირებულება მონტაჟიანად 2000 ლარამდეა. პროგრამის ბენეფიციარმა ისიც უსასყიდლოდ მიიღო. ერთი დღის მზე საკმარისია, რომ წყლის ტემპერატურა ერთი კვირის განმავლობაში შენარჩუნდეს.
კლიმატის სწრაფი ცვლილება ბუნებრივი რესურსების გონივრული გამოყენების აუცილებლობის წინაშე გვაყენებს. ამ მხრივ მნიშვნელოვანია, რომ ფერმერებმა — როგორც ინტენსიურ, ისე საოჯახო მეურნეობებში — წვეთოვანი სარწყავი სისტემები დანერგონ. ასევე უმნიშვნელოვანესია, რომ მოხმარებული წყალი ისევ ბუნებას დაუბრუნდეს. თუმცა, იქიდან გამომდინარე, რომ წყალს მოხმარებისას ვაბინძურებთ, საჭიროა მისი გაფილტრაცია და გაწმენდა მავნე ნივთიერებებისგან.
სადემონსტრაციო ლოკაციაზე მუშაობს წყლის საფილტრაციო სისტემა. სპეციალური ფილტრი, რომელიც პერიოდულად ირეცხება, სასმელ წყალს ფილტრავს. სპეციალურ სადრენაჟე ორმოში იფილტრება მოხმარებული წყალიც — აბაზანისა და სამზარეულოს წყალი. აქედან ტოქსინებისგან დაცლილი წყალი უბრუნდება ბუნებას, მიწას და ხშირად ასეთ წყალს ნარგავებისა და ნათესების სარწყავად იყენებენ.
რესურსების დაზოგვისა და გონივრულად გამოყენების მხრივ, ენერგოეფექტურობისთვის კიდევ ერთი მნიშვნელოვანი მიმართულება, განსაკუთრებით რეგიონში, ენერგოეფექტური ღუმელები და შეშის ალტერნატივაა. ტორსას სადემონსტრაციო დემო-საიტზე მისულ სტუმრებს პროექტის ფარგლებში შექმნილი საწვავი ბრიკეტებიც აჩვენეს და უსასყიდლოდ ბენეფიციარისთვის გადაცემული ენერგოეფექტური ღუმელიც.
თუ თქვენ ცხოვრობთ ისეთ ადგილზე, სადაც შესაძლებელია შემდეგი მასალების მოპოვება: ფოთლები, ბოსტნეულის ღერო, სიმინდის ღერო, ტოტები, თხილის ნაჭუჭი, ნამჯის ნარჩენები, ქაღალდი, ნახერხი, წალამი და სხვა, მაშინ თქვენ შეგიძლიათ საწვავი ბრიკეტების მიღება. საწვავი ბრიკეტის წარმოება არის თანამედროვე მიდგომა გარემოსადმი — ტექნოლოგია, რომელიც იცავს ტყეებს განადგურებისგან, ხელს უწყობს ეროზიული მოვლენებისა და გაუდაბნოების პროცესის შეჩერებას და ამასთან ეკონომიკურად მომგებიანია.
ბიომასა (ორგანული ნარჩენები) წარმოადგენს ენერგიის ძვირფას წყაროს და მისი გამოყენება შესაძლებელია შეშის ალტერნატივად საჭმლის მოსამზადებლად და გათბობისთვის — სრულად ან ნაწილობრივ მაინც.
ხისგან განსხვავებით, ბრიკეტს ცეცხლი ადვილად ეკიდება, ნაკლებად ბოლავს, თანაბარ ტემპერატურას გამოყოფს წვის დროს და მაღალი თბოკალორიული ღირებულება აქვს. ორგანული მასისგან დამზადებული ბრიკეტი 22%-ით მეტ ხანს იწვის, ვიდრე შეშა და 18%-ით მეტ სითბოს გამოყოფს.
ბრიკეტირების მთელი პროცესი მოიცავს: ნარჩენების შეგროვებას; დანაწევრებას; კომპოსტირებას; დაპრესვას.
ორგანულ მასაში არსებული ტენი (წყალი) ბრიკეტირების მანქანის (პრესის) საშუალებით უნდა გამოიწუროს. მიღებული მასა იპრესიება ბრიკეტების ფორმით, რის შემდეგაც აუცილებელია მისი გამოშრობა.
ბრიკეტირების დასამზადებლად დასაქუცმაცებელი დაზგის აწყობა ადვილად შესაძლებელია საკუთარი ხელით, რადგან მისი კონსტრუქცია მარტივია.
RCDA-ის პროგრამის — „მედეგობის გაძლიერება: ადგილობრივი შესაძლებლობების გაზრდა კლიმატის ცვლილებასთან ადაპტაციისთვის“ — ფარგლებში სამ სოფელში: თორსაში, პირველ მაისსა და ახალსოფელში სამუშაოები სადემონსტრაციო საიტების (დემო-საიტების) მოწყობაზე დასრულებულია.
ენერგიის სხვადასხვა წყაროს ძიება და გამოყენება უხსოვარი დროიდან კაცობრიობის ფიქრისა და განსჯის საგანია. პირველყოფილი საზოგადოებისთვის ენერგიის ძირითადი წყარო შეშით ცეცხლის დანთება იყო. დაახლოებით 300 წლის წინ ადამიანებმა ქვანახშირის ფართო გამოყენება დაიწყეს, 100 წლის წინ კი — ნავთობის. ეს უდიდესი მნიშვნელობის მქონე სიახლე იყო, რომელმაც მსოფლიო სრულად შეცვალა. დღეს კი კაცობრიობა კვლავ რევოლუციური გარდაქმნების წინაშეა — ქვანახშირისა და ნავთობის მოხმარებიდან განახლებადი ენერგიის წყაროებზე: მზის, ქარის, წყლის, გეოთერმული და ბიომასის ენერგიაზე გადასვლას ცდილობს. პარალელურად, მიმდინარეობს უფრო ეფექტური ტექნოლოგიების კვლევა და განვითარება. დროა, ქართველმა ფერმერმაც და ზოგადად საქართველოს ყველა მოქალაქემ ამ მიმართულებით მეტი იფიქროს.
Loading ...