ევროპაში თხილის ყველაზე ცუდი მოსავალია – პროდუქციაზე ფასები შესაძლოა, მკვეთრად გაიზარდოს

ევროპაში ბოლო წლების განმავლობაში თხილის ყველაზე ცუდი მოსავალი დაფიქსირდა. ამის შესახებ AgroExpert წერს.

კერძოდ, იტალიის ისეთ რეგიონებში, როგორიც პიემონტი, ლაციო და სიცილიაა, წლევანდელ სეზონზე მოსავლის აღება ჩვეულებრივზე ადრე, ოქტომბრის შუა რიცხვებში დასრულდა. მიზეზი ცუდი მოსავალია, რამაც, დაახლოებით, 70 000 ტონა შეადგინა და რაც ჩვეულებრივი რაოდენობის, თითქმის, ნახევარია. ეს ბოლო ათწლეულის ყველაზე ცუდი შედეგია.

წელს ჩილე პირველად გადაასწრებს იტალიას თხილის წარმოებით და 100 000 ტონით მსოფლიოში თურქეთის შემდეგ მეორე ადგილს დაიკავებს.

ბაზრის ლიდერი, თურქეთიც წელს მოსავლის საშუალო დონეს ვერ აღწევს. თურქი ექსპერტების შეფასებით, 2025/26 წლების სეზონზე წარმოება 22%-ით შემცირდა, მოსავალი კი 609 000 ტონას შეადგენს. წარმოების შემცირების მიზეზად აპრილში შავი ზღვის რეგიონში დამდგარი ყინვები და მავნებლების მიერ გამოწვეული ზიანი სახელდება.

ესპანეთში მოსავალი ისტორიულ წარმოების პოტენციალს, ასევე, მნიშვნელოვნად ჩამორჩება. 2024 წელს ესპანელმა ფერმერებმა მხოლოდ 2 000 ტონა თხილი დაკრიფეს და წელსაც ანალოგიურ მოსავალს მოელიან, მაშინ, როცა ქვეყნის წარმოების პოტენციალი 8000-დან 10000 ტონამდეა.

2024 წელზე მეტი თხილი მხოლოდ საფრანგეთში დაიკრიფა, სადაც მოსავალმა წლევანდელ სეზონზე, დაახლოებით, 12 000 ტონა შეადგინა.

AgroExpert-ის ცნობით, ევროპაში თხილის მოსავლიანობის მკვეთრი კლება კონკრეტული ფაქტორებით არის განპირობებული. ეს არის კლიმატის ცვლილება, ანუ რბილი ზამთარი, გაზაფხულზე ძლიერი წვიმები შემდგომი გვალვითა და მავნებლები, როგორიც არის თხილის ბაღლინჯო (Phylus coryli).

ასევე, ფართოდ გავრცელდა დამწიფებამდე თხილის ცვენის მოვლენა, რისი მიზეზებიც ბოლომდე არ არის შესწავლილი. მათ შორის სახელდება ცუდი დამტვერვა, გენეტიკური ანომალიები, თესლის ზრდის დროს ტენიანობის და/ან საკვები ნივთიერებების ნაკლებობა, არახელსაყრელი ამინდის პირობები და პათოგენების, ანუ მწერების, მავნებლების, სოკოების ზემოქმედება.

გადამამუშავებლები გაფრთხილებას იძლევიან, რომ წლევანდელმა ცუდმა მოსავალმა შესაძლოა, თხილის პროდუქციაზე ფასების მკვეთრი ზრდა გამოიწვიოს. ინდუსტრია თხილისა და კაკაოს კრემების ღირებულების მნიშვნელოვან ზრდას პროგნოზირებს, რომლებიც საშობაოდ ევროპელების საყვარელი ნუგბარია.

www.bpn.ge