ევროპული კომისია ელექტრონული კომერციის ჩინური პლატფორმა Temu-ს წინააღმდეგ ახალ გამოძიებას იწყებს, რათა დაადგინოს, იცავს თუ არა კომპანია წესებს, რომლებიც ონლაინ პლატფორმებზე უკანონო პროდუქტების გაყიდვის პრევენციას ახდენს – ამის შესახებ Bloomberg-ი ანონიმურ წყაროზე დაყრდნობით წერს.
მედიის ინფორმაციით, გამოძიების შესახებ ცნობები მას შემდეგ გავრცელდა, რაც, 11 ოქტომბერს, ევროკომისიამ Temu-სგან ინფორმაცია “ციფრული სერვისების აქტის” ფარგლებში გამოითხოვა. კომისია ცდილობდა გაერკვია, რა ზომებს ატარებს Temu იმისთვის, რომ თავის პლატფორმაზე არალეგალური პროდუქტის გაყიდვა შეაჩეროს.
Temu-ს აღნიშნული ინფორმაციის წარსადგენად ვადა 21 ოქტომბრამდე განესაზღვა. კომისია აცხადებდა, რომ ჩინური კომპანიის მიერ წარდგენილი ინფორმაციის მიხედვით გადაწყდებოდა, რა იქნებოდა მომდევნო ნაბიჯები.
აღსანიშნავია, რომ ევროკავშირის ციფრული სერვისების აქტის ფარგლებში, კომპანიები, რომლებსაც 45 მილიონ მომხმარებელზე მეტი ჰყავთ, “ძალიან მსხვილი ონლაინ პლატფორმები” (“VLOP”-ები) ეწოდებათ და უკანონო პროდუქტების გავრცელების პრევენციის უფრო მაღალი ვალდებულება აქვთ. კომისიამ VLOP-ის სტატუსი Temu-ს მაისში მიანიჭა.
Loading ...