ევროკავშირის ლიდერები რუსული ნავთობის იმპორტის ორ მესამედზე მეტის აკრძალვაზე შეთანხმდნენ

ევროკავშირის ლიდერები რუსული ნავთობის იმპორტზე ემბარგოს დაწესების კომპრომისულ ვარიანტზე შეთანხმდნენ, რომელიც ნავთობის იმპორტის ორ მესამედზე მეტის აკრძალვას ითვალისწინებს.

რუსულის ნავთობის იმპორტზე ემბარგოს დაწესება არის ბრიუსელის სამიტზე დამტკიცებული სანქციების მეექვსე პაკეტის ნაწილი, რომელზეც 27-ვე წევრი ქვეყანა უნდა შეთანხმებულიყო.

ევროპული საბჭოს პრეზიდენტის, შარლ მიშელის განცხადებით, სანქციები დაუყოვნებლივ აისახება რუსული ნავთობის იმპორტის 75%-ზე, ხოლო ევროპაში იმპორტირებული რუსული ნავთობის 90%-ი წლის ბოლომდე აიკრძალება.

„შეთანხმება მოიცავს რუსეთიდან ნავთობის იმპორტის ორ მესამედზე მეტს, რაც წყვეტს მისი ომის მანქანის დაფინანსების უზარმაზარ წყაროს. ევროპულმა საბჭომ სანქციების მეექვსე პაკეტზე შეთანხმებას მიაღწია. სანქციები დაუყოვნებლივ აისახება რუსული ნავთობის იმპორტის 75%-ზე, ხოლო ევროპაში იმპორტირებული რუსული ნავთობის 90%-ი წლის ბოლომდე აიკრძალება,” – განაცხადა ევროპული საბჭოს პრეზიდენტმა, შარლ მიშელმა.

შეთანხმება კომპრომისულია და თავდაპირველად აკრძალვა არ შეეხება მილსადენებით იმპორტირებულ რუსულ ნავთობს. პაკეტის კომპრომისულ ვარიანტზე შეთანხმება უნგრეთის პოზიციის გამო მოხდა, რომელიც ნავთობის იმპორტის აკრძალვას ეწინააღმდეგებოდა.

ევროკავშირი ასევე შეთანხმდა რუსეთის უმსხვილესი ბანკის, „სბერბანკის“ SWIFT-ის სისტემიდან გათიშვაზე, სამი მსხვილი რუსული სახელმწიფო მაუწყებლის აკრძალვასა და უკრაინაში სამხედრო დანაშაულებებზე პასუხისმგებელი პირების წინააღმდეგ სანქციების დაწესებაზე.

ევროკომისიის პრეზიდენტმა ურსულა ფონ დერ ლაიენმა განაცხადა, რომ აკრძალვა წლის ბოლომდე, ფაქტობრივად, შეამცირებს რუსეთიდან ევროკავშირში იმპორტირებული ნავთობის დაახლოებით 90%-ს, რადგან გერმანიამ და პოლონეთმა აიღეს ვალდებულება, უარი თქვან მათ ტერიტორიაზე ნავთობის მილსადენით მიწოდებაზე.

„ჩვენ გვაქვს მკაფიო პოლიტიკური განცხადება პოლონეთისა და გერმანიის მხრიდან, რომ ისინი, ისევე როგორც სხვა დანარჩენები, შეამცირებენ რუსეთის ნავთობის იმპორტს წლის ბოლომდე. ჩვენ მთლიანობაში ვფარავთ რუსული ნავთობის 90%-ს, რომელიც ამ დროის განმავლობაში შემცირდება. დარჩენილია 10 ან 11%, რომელიც დაფარულია სამხრეთ „დრუჟბას“ მიერ. ჩვენ ამ დროისთვის შევთანხმდით გამონაკლისზე,”- აღნიშნა ევროკომისიის ხელმძღვანელმა.

მისი თქმით, ლიდერები ასევე შეთანხდნენ, იმუშაონ მექანიზმზე, რომელიც უკრაინის ახალი, 9 მილიარდ ევრომდე ღირებულების განსაკუთრებული მაკროფინანსური დახმარების პაკეტით უზრუნველყოფას ითვალისწინებს.