დღეს დილიდან თბილისში „ნაბეღლავის“, „ბახმაროს“, „ჯეო ნატურას“, „რაუხის“ წვენების და „ბუღას“ მწარმოებელი კომპანია „წყალი მარგებელის“ 70 თანამშრომელი გაიფიცა.
როგორც BM.GE-სთან საუბრისას ერთ-ერთი გაფიცული დავით კუცია განმარტავს, ხელფასების ზრდის მოთხოვნით 70 დისტრიბუტორი და მომარაგებაში დასაქმებული პირი გაერთიანდა. გაფიცულები მაღაზიებში პროდუქტის შეტანაზე უარს აცხადებენ, მანამდე სანამ მათი მოთხოვენი არ დაკმაყოფილდება.
„გაფიცვა დიდ დიღომში როსტევანის ქუჩაზე განთავსებულ ცენტრალურ ოფისთან მიმდინარეობს. ვითხოვთ ჩვენი შრომის დაფასებას, რეალურად რაც გვეკუთვნის იმათ ვითხოვთ. 600 ლარი გვაქვს ხელფასი და დამატებით გვეკუთვნის ბონუსები, რომელიც გატანილი მოცულობის მიხედვით უნდა დაანგარიშდეს, თუმცა ეს ასე არ ხდება და ჩვენი შრომა არ ფასდება. ამასთან მხოლოდ კვირა დღეს გვასვენებენ. ვითხოვთ ფიქსირებული ხელფასი 1000 ლარამდე გაგვეზარდოს და ამას დაემატოს ბონუსები, რაც მოუწევს“, – ამბობს გაფიცული.
მისივე ინფორმაციით, კომპანიის წარმომადგენელი დილით გაესაუბრა გაფიცულებს, თუმცა კონკრეტული არაფერი უთქვამთ.
„ახლა აპირებენ, რომ თავად დასხდნენ მანქანებზე და გაიტანონ ტვირთი ობიექტებზე, თუმცა ჩვენ ამას არ დავუშვებთ. ჩვენ ვითხოვთ იმას, რაც გვეკუთვნის. არ დავიშლებით სანამ კომპანია ჩვენს მოთხოვნებს არ შეასრულებს“, – აღნიშნავს დავით კუცია.
სადისტრიბუციო კომპანია „ენგადი“, რომელიც „მარგებელი ჰოლდინგში“ შემავალი კომპანიაა, დღეს გაფიცული 70-მდე თანამშრომლის მოთხოვნას სპეციალური განცხადებით პასუხობს, სადაც აღნიშნულია, რომ კომპანია თანამშრომლებთან დიალოგის რეჟიმში განაგრძობს მუშაობას.
BM.GE სადისტრიბუციო კომპანიის განცხადებას უცვლელად გთავაზობთ:
„20 მაისს კომპანიის თანამშრომელთა მცირე ნაწილი, დაახლოებით 70 ადამიანი ხელფასისა და სამუშაო განრიგის გადახედვის მოთხოვნით გაიფიცა. ოფიციალური მონაცემებით დასაქმებულთა მიერ ხელზე აღებული ანაზღაურება ჯამში 1000 ლარამდეა და არა 600 ლარი, როგორც გაფიცულები აცხადებენ. დამატებით, კომპანია მათ კერძო სამედიცინო დაზღვევით უზრუნველყოფს და ასევე მათ ხუთ საგზაო ჯარიმას ფარავს.
შპს „ენგადი“ 200-მდე პროდუქტის დისტრიბუტორი კომპანიაა, რომელიც ბაზარზე 20 წელია ოპერირებს. ქვეყანაში ინფლაციისა და დევალვაციის მიუხედავად, „ენგადი“ მუშაობას განაგრძობდა.
როგორც ნებისმიერი ადამიანისთვის, ასევე კომპანიისთვისაც დიდ პრობლემას წარმოადგენს ქვეყნის მძიმე ეკონომიკური მდგომარება და მიუხედავად ამისა, ახერხებს თანამშრომელთა შენარჩუნებას. კომპანიის მენეჯმენტში არ არის თანამშრომელი, რომელსაც არ აქვს გავლილი სადისტრიბუციო ჯაჭვის ყველა რგოლი, შესაბამისად არ არის უცხო ყველა პოზიციის სამუშაოს გამოწვევა.
სადისტრიბუციო კომპანია „ენგადს“ 20 წლის მანძილზე არასდროს უჭირდა კომუნიკაცია და დიალოგი იმ თანამშრომლებთან, რომლებმაც ეს კომპანია შექმნეს და წარმატებულად აქციეს, ასეთივე პოლიტიკით ვაპირებთ მომავალშიც საქმიანობის გაგრძელებას“, – ნათქვამია კომპანიის მიერ გავრცელებულ განცხადებაში.
www.bm.ge