დღეს თბილისში უკანასკნელ გზაზე გააცილებენ მერაბ სიორიძეს. საქართველოში ერთ-ერთი პირველი რეგიონული ტელევიზიის, სამაუწყებლო კომპანია “გურიას” დამფუძნებელი და დირექტორი მერაბ სიორიძე 7 მაისს გარდაიცვალა. ის ბოლო პერიოდის მანძილზე საკმაოდ ვერაგ დაავადებას ებრძოდა, თუმცა საბოლოოდ ავადმყოფობის დამარცხება ვერ შეძლო. მერაბ სიორიძე გურიის რეგიონში ერთ- ერთი გამორჩეული ფიგურა იყო. მისი საინტერესო მოღვაწეობიდან ერთ-ერთი ყველაზე მნიშვნელოვანი მოვლენა გურიის ტელევიზიის შექმნა იყო. როგორც ახლა ტელევიზიის თანამშრომლები იხსენებენ, არეულ და ბნელ 90-იანებში ძველი სტერეოტიპების ნგრევა და ახალი გრანდიოზული წამოწყების განხორციელება საკმაოდ რთული საქმე იყო. რომ არა მერაბის ნიჭიერება, საქმისადმი სიყვარული და პრიციპულობა ამის გაკეთება თითქმის შეუძლებელი ჩანდა. არაერთმა ახალგაზრდამ, რომელიც ოზურგეთიდან თბილისში იყო წასული, დედაქალაქი მიატოვა და ახალ ტელევიზიაში სამუშაოდ გურიაში დაბრუნდა. საზოგადოებაში აქტიური მსჯელობა იყო, თუ რამდენი წლის პერსპექტივა ექნებოდა რეგიონულ ტელევიზიას, იქნებოდა თუ არა ეს მომავლის იდეა. როგორც ტელევიზიის თანამშრომლები ამბობენ, მაშინ ყველა ერთიანად ენდო მერაბ სიორიძეს, სჯეროდათ მისი ორგანიზატორული ნიჭის და დაუოკებელი სწრაფვის ახალი იდეის განხორციელებისთვის. მან შეძლო მოეზიდა ფინანსური, ტექნიკური თუ ადამიანური რესურსი, დედაქალაქიდან მოეწვია პროფესიონალები, გადაემზადებინა კადრები და შეექმნა სიყვარულით სავსე დიდი ოჯახი, რომელსაც გურიის ტელევიზია ერქვა. დღეს ადამიანები, რომლებიც სხვადასხვა დროს ამ ტელევიზიაში მუშაობდნენ, სხვადასხვა სფეროში ძალიან წარმატებულად მოღვაწეობენ. ეს უპირველეს ყოვლისა მერაბ სიორიძის გამარჯვებაა. ამიტომაც მარადიული და უკვდავია მისი სახელი. ძნელად მოიპოვება ადამიანი, რომელსაც გული არ დაწყვიტა მისმა გარდაცვალებამ. მერაბ სიორიძეს დღეს სიონის საკათედრო ტაძრიდან გამოასვენებენ.
Loading ...
