დღეიდან პირბადის ტარება ღია სივრცეშიც სავალდებულოა – დარღვევაზე ჯარიმა 20 ლარია

დღეიდან პირბადის ტარება ღია სივრცეებშიც სავალდებულო ხდება. ამის შესახებ გადაწყვეტილება გუშინ მთავრობის უწყებათშორისმა საბჭომ მიიღო. წესის დარღვევის შემთხვევაში ჯარიმა 20 ლარი იქნება.
როგორც ვიცე-პრემიერმა, მაია ცქიტიშვილმა განაცხადა, პირბადე კორონავირუსისგან თავის დაცვის ყველაზე ეფექტური სშუალებაა.
„საარჩევნო პროცესი ძალიან მაღალი მობილობით ხასიათდება. ბევრ დასახლებაში გვიწევს მეორე ტურის ჩატარება, შეიძლება ველოდოთ ინფიცირებულთა რაოდენობის ზრდასაც. მიუხედავად იმისა, რომ ჯერ კიდევ ვინარჩუნებთ დადებით დინამიკას იმ მიმართულებით, რომ ინფიცირებულთა ზრდა არ არის ძალიან მაღალი, როგორც ხედავთ, გამოჯანმრთელებულების ძალიან კარგი სტატისტიკაც გვაქვს, უნდა ვიზრუნოთ იმაზე, რომ ვირუსის გავრცელება შევაჩეროთ. ამიტომ გადაწყდა, რომ პირბადეების ტარება იქნება სავალდებულო არა მხოლოდ დახურულ არამედ ღია სივრცეებშიც“, – განაცხადა მაია ცქიტიშვილმა.
ცნობისთვის, ამ დრომდე პირბადეების ტარება მხოლოდ დახურულ სივრცეებში იყო სავალდებულო.