დუმის სპიკერმა რუსეთის ყველაზე არამეგობრული ქვეყნების სია გამოაქვეყნა

რუსეთის სახელმწიფო დუმის სპიკერი, ვიაჩესლავ ვოლოდინი მიიჩნევს, რომ შეერთებული შტატები, კანადა და შვეიცარია რუსეთის მიმართ ყველაზე არამეგობრულად განწყობილი ქვეყნები არიან დაწესებული სანქციების რაოდენობის მიხედვით, რამაც ენერგორესურსებისა და სურსათის ფასების გლობალური ზრდა გამოიწვია.

რუსული მედიის ინფორმაციით, სახელმწიფო სათათბიროს სპიკერმა რუსეთის წინააღმდეგ დაწესებული სანქციების რაოდენობის მიხედვით ყველაზე არამეგობრული ქვეყნების სია გამოაქვეყნა.

„პირველ ადგილზეა შეერთებული შტატები, რომელმაც რუსეთს 1983 სანქცია დაუწესა, მეორე ადგილზეა კანადა, რომელმაც რუსეთის ფედერაციის წინააღმდეგ 1402 სანქცია შემოიღო, პირველ სამეულში შედის შვეიცარია, 1361 ანტირუსული სანქციით. სიაში შედის ასევე ბრიტანეთი (1360 სანქცია), ევროკავშირი (1199 სანქცია), ავსტრალია (1150) და იაპონია (902). ჩვენი ქვეყნის წინააღმდეგ დაწესდა 10 536 სანქცია, 2022 წლის 24 თებერვლამდე – 2 754, შემდეგ კიდევ 7 782″, – ნათქვამია ვოლოდინის ტელეგრამის არხზე გამოქვეყნებულ მონაცემებში.

მისი მტკიცებით, რუსეთის წინააღმდეგ „უკანონო სანქციების“ შემოღებით, ამ სახელმწიფოებმა გამოიწვიეს ფასების ზრდა ენერგორესურსებსა და საკვებზე.

„ესენი არიან მსოფლიოში არსებული პრობლემებისა და მომავალი კრიზისების მთავარი დამნაშავეები”, – აცხადებს ვოლოდინი.