დიმიტრი ხუნდაძე – მმართველი გუნდი ოპოზიციას სახიფათო თამაშში არ უნდა შეყვეს, თუ ამას გააკეთებს, მაჟორიტარები და არამხოლოდ, კიდევ ერთხელ გამოვიყენებთ მუხრუჭს

როგორც ჩანს, ოპოზიციამ პასუხისმგებლობასთან ერთად, სერიოზულობაც დაკარგა და ციფრებით თამაში დაიწყო, – ამის შესახებ საპარლამენტო უმრავლესობის წევრმა, პარლამენტის ჯანდაცვის კომიტეტის თავმჯდომარე დიმიტრი ხუნდაძემ განაცხადა.

მისი თქმით, ოპოზიციას საარჩევნო სისტემასთან დაკავშირებით ისეთი შეთავაზების გაკეთება სურს, რომელსაც შედეგი არ ექნება და შემდეგ გადავლენ რევოლუციურ სცენარზე.

„კიდევ უფრო ღრმავდება ეჭვი, რომ მათ უნდათ იმდაგვარი შემოთავაზება, რომელსაც შედეგი არ ექნება და გადავლენ მათთვის სასურველ რევოლუციურ სცენარზე. ვფიქრობ, რომ მმართველი გუნდის მიერ არის უკიდურესი კომპრომისული ვარიანტი შეთავაზებული, რის იქეთაც უკვე კრიზისი ქვეყანაში არის მოსალოდნელი. ამიტომ მმართველი გუნდი სახიფათო თამაშში ოპოზიციას არ უნდა შეყვეს და თუ ის ამას გააკეთებს, ჩვენ მაჟორიტარები და არამხოლოდ მაჟორიტარები, კიდევ ერთხელ გამოვიყენებთ მუხრუჭს“, – განაცხადა დიმიტრი ხუნდაძემ.

„ევროპული საქართველოს“ წევრმა, ლევან თარხნიშვილმა გუშინ განაცხადა, რომ ოპოზიცია მოლაპარაკებებს აწარმოებს და გამორიცხული არ არის, მმართველ გუნდს საარჩევნო სისტემასთან დაკავშირებით შუალედური კომპრომისული ვარიანტი შესთავზოს.

www.1tv.ge