სოფელ ბუკნარში მუსლიმმა მოსახლეობამ პოლიციის კორდონი გაარღვია და ბუკნარის ცენტრში მივიდა, სადაც ტერიტორია დაიკავა. მართლმადიდებელმა მოსახლეობა, რომელიც სოფლის ცენტრში აქციას მართავდა, ნახევარი საათით ადრე დაიშალა და ტერიტორია დატოვა. პოლიციამ კორდონი აღმართა და პერიმეტრს აკონტროლებს. ადგილზე მობილიზებულია საპატრულო და კრიმინალური პოლიციის ეკიპაჟები, ასევე იმყოფებიან გურიის გუბერნატორი და ადგილობრივი ხელისუფლების სხვა წარმომადგენლები.
ჩოხატაურის მუნიციპალიტეტში, სოფელ ბუკნარში, ქობულეთისა და დასავლეთ საქართველოს მუფთი, ასლან ბერიძე იმყოფება. ბერიძემ ბუკნარის სამლოცველოში ლოცვა ჩაატარა, შემდეგ კი, ადგილობრივ მუსლიმებს, მიუხედავად მათზე განხორციელებული თავდასხმებისა სიმშვიდისკენ მოუწოდა და თხოვა თავი შეიკავონ იგივე ქმედებებისგან. როგორც ჟურნალისტებს ბერიძემ განუცხადა- პარასკევის ლოცვა ყოველკვირეულად ჩატარდება და ეს ხელს არვის შეუშლის. ბერიძე მზადაა ადგილობრივ ხელისუფლებასთან და მოსახლეობასთან მოლაპარაკებებში ჩაერთოს.
ბუკნარის ცენტრში შეკრებილი მართლმადიდებელი მოსახლეობა სოფელში მუსლიმური სამლოცველოს მოწყობას ეწინააღმდეგება – “ზოტში, ნასაკირალში, ორი ფეხის ნაბიჯზე არის უკვე ორი მეჩეთი, იქ წავიდნენ და ილოცონ, ლოცვას არავინ უშლის, უბრალოდ აქ კიდევ ერთი მეჩეთის მოწყობას ვეწინააღმდეგებით”- აცხადებენ სოფლის ცენტრში შეკრებილი მართლმადიდებელი ადგილობრივები.
შეგახსენებთ, წუხელ რელიგიურ ნიადაგზე, სოფელ ბუკნარში, მუსლიმებსა და ქრისტიანებს შორის დაპირისპირება მოხდა. დაშავდა ორი ახალგაზრდა, მათშორის ერთი არასრულწლოვანი, მას, თავზე ნაკერები დაადეს. აღნიშნულ ფაქტზე, შინაგან საქმეთა სამინისტროს გურიის პოლიციის დეპარტამენტის თანამშრომლებმა, ჩატარებული ოპერატიული და საგამოძიებო ღონისძიებების შედეგად, 1985 წელს დაბადებული გ.ს. დააკავეს. მას ბრალი ძალადობაში ედება.გამოძიება საქართველოს სსკ-ის 126-ე მუხლის პირველი ნაწილით მიმდინარეობს, რაც ცემას ან სხვაგვარ ძალადობას გულისხმობს და ექვსი თვიდან ერთ წლამდე ვადით თავისუფლების აღკვეთას ითვალისწინებს.