დანაგვიანებული მოსაცდელები და გზისპირები თხინვალსა და მერიაში

სოფელ თხინვალისა და მერიის დამაკავშირებელ გზაზე მოქალაქეები დანაგვიანებულ გზას უჩივიან. სავარაუდოდ, ნარჩენებს გამველი ტრანსპორტიდან ყრიან ხოლმე.  ნაგვის ურნების სიხშირით  არ გამოირჩევა სოფელი თხინვალიც. მოქალაქეებს საკმაოდ შორი მანძილის გავლა უწევთ საყოფაცხოვრებო ნარჩენების ურნასთან მისატანად. პრობლემებია ამ მხრივ სოფელ მერიაშიც.  მერიის ცენტრში მდებარე მგზავრთა მოსაცდელი უმეტესად დაბინძურებულია და  აქ ტრანსპორტის ლოდინი ძალიან არასასიამოვნოა. არ იქნებოდა ცუდი, თუ მოსაცდელთან სანაგვე ურნას დაიდგმებოდა, თუმცა არც ის იქნება გასაკვირი, თუ მოქალაქეები ნარჩენებს ისევ ასე დაყრიან, რადგან მოსაცდელიდან არც ისე შორს დგას ურნა, რომ მისვლა ვერ შესძლებოდათ. გამოკითხულთა უმრავლესობამ ამ თემაზე საჯაროდ საუბარს თავი აარიდა. ძირითადად, ამ პრობლებით შეწუხებული მაღაზიის მფლობელები და გამყიდველები აღმოჩნდნენ. ერთ-ერთი მაღაზიის მფლობელმა, ნანა ცერცვაძემ ჩემთან საუბრის დროს აღნიშნა, რომ არა მხოლოდ ქუჩებში, არამედ სანიაღვრეშიც ყრიან ნარჩენებს, რის გამოც გაუსაძლისი სუნი დგება. მისი აზრით არ არის საკმარისი კანონით გათვალისწინებული სანქციები. იმისათვის, რომ მოქალაქეები წესებს დაემორჩილონ, კანონები უნდა გამკაცრდეს და მეტი ყურადღება მიექცეს სოფლებს.

თემაზე პროექტის ”ახალგაზრდები რეგიონის განვითარებისთვის” ფარგლებში ნატო გელაშვილმა იმუშავა.